Kosovë, eurodeputetët takohen me krerët e shtetit për MSA-në

Kosovë, eurodeputetët takohen me krerët e shtetit për MSA-në

Deputetë të Parlamentit Europian, të kryesuar nga eurodeputeti Tonino Picula, kanë qëndruar të hënën në Prishtinë, ku janë takuar me deputetët kosovarë të Komisionit parlamentar për Marrëveshjen e Stabilizim-Asociimit.

Gjatë qëndrimit në Prishtinë, eurodeputetët janë pritur në takime të veçanta nga krerët më të lartë të institucioneve të Kosovës, ndërsa pasdite kanë zhvilluar mbledhjen e parë të përbashkët me deputetët kosovarë, për të parë axhendën e përbashkët të punës për zbatimin e MSA-së.

Në fillim të seancës së përbashkët, që u mbajt në sallën e seancave plenare të Kuvendit të Kosovës, kryeaparlamentari kosovar Kadri Veseli falënderoi Parlamentin Europian për mbështetjen e vazhdueshme që i ka dhënë Kosovës, në hapat e saj drejt integrimit europian.

Veseli i siguroi deputetët e PE-së se, Kosova do të zbatojë me përpikmëri të gjitha kriteret e kërkuara, ndërsa u shpreh optimist se gjatë kësaj legjislature, Kosova do të ketë mundësi të marrë statusin e kandidatit për anëtarësim në Bashkimin Europian.

Edhe kryesuesi i delegacionit të eurodeputetëve, Tonino Picula u shpreh i bindur se, Kosova do të mund të përmbushë kriteret dhe të përfitojë shumë nga zbatimi i MSA-së, ndërsa i siguroi deputetët kosovarë për bashkëpunim dhe ndihmë në të gjitha fushat e nevojshme për të cilat kanë nevojë institucionet e Kosovës.

Për të përmbyllur punimet e këtij takimi, të martën vjen në Prishtinë Komisionieri për Zgjerimin, Johannes Hahn, i cili do të takohet edhe më krerët e shtetit e udhëheqësit e opozitës.

Redaksia Flaka
nga Redaksia Flaka Maj 17, 2016 08:50

REKLAMA