Лицата со посебни потреби се во центарот на вниманието само на 3 декември, односно на нивниот меѓународен ден. Во другите денови од годината, нивните проблеми и грижи речиси никој не ги зема в предвид. Ова е ставот на Џелил Шкрета, кој долги години ја користи оваа електрична количка. Штом ќе излезе од куќата, Шкрета вели дека се соочува со тротоари и патишта блокирани од автомобили кои го попречуваат неговото слободно движење.
„Видете, автомобилот овде ме удри, ме удри и овде. Има патишта за движење, но се блокирани од автомобили. Полицијата не излегува, општината не презема мерки за расчистување. Ако нема кој да ми помогне, останувам таму. Често сум паднал, но ми помогнале. Имаше случај кога жена со деца во раце, го остави детето и ми помогна. Не само мене туку ги има многу. Повеќе се движиме со овие колички, ако ги немаме, остануваме“.
Според Шкрета, лицата од оваа категорија се дискриминирани поради немањето соодветна инфраструктура во различни институции.
„Посебно нашите улици треба да бидат празни и кога треба да одиме некаде, во некоја амбуланта. Немаме како да влеземе, да влеземе со количка, морам да им јавам на тие горе. Не добивам помош бидејќи немам државјанство. Овде сум од 1970 година но ми велат дека не ги исполнуваш условите, имаш проблем. Оттогаш ме направија проблематичен.“
Градоначалничката на Град Скопје, Данела Арсовска, ги задолжи сите јавни институции во Скопје во рок од 60 дена да создадат соодветни инфраструктурни услови за лицата со посебни потреби. Во оваа прилика, Комисијата за спречување и заштита од дискриминација презентираше четири општи препораки за институциите за елиминирање на систематската дискриминација на лицата со попреченост: здравствена заштита и пристап до пунктови за вакцинација, унапредување и заштита на човековите права и достоинството на осудените лица со попреченост, соодветно регулирање и пристап до избирачките места и спроведување на одредбите од Конвенцијата за правата на лицата со попреченост.
