1500 migrantë në Selanik synojnë RMV-në, Spasovski: Veprojmë sipas rregullativave të BE-së

Redaksia 2 vjet ago

Qindra migrantë gjenden aktualisht në një kamp në afërsi të Selanikut në përpjekje të vazhdueshme për të kaluar kufirin drejt Maqedonisë së Veriut e më pas drejt Europës.

Përpjekjet e tyre për t’u larguar nga Selaniku kanë eskaluar edhe në dhunë, teksa përpiqeshin të thyejnë kordonin policor dhe policia greke u kundërpërgjigj me gaz lotsjellës dhe shokbomba, migrantët janë kundërpërgjigjur me gurë dhe shkopinj. Tre policë janë lënduar, kurse një person është arrestuar gjatë përplasjeve. MPB është në komunikim të përditshëm me Policinë e Greqisë, që po ballafaqohet me situatën. Ministri Spasovski u zotua se do të veprojë konform rregullativave të BE-së.

“Ky numër i madh i mbledhur në kampin në Greqi është prej dje dhe ne përmes planeve e kemi forcuar sigurimin e kufirit shtetëror mes Maqedonisë së Veriut dhe Greqisë. Deri tani bëhet fjalë për diku grup prej 1200 deri më 1500 migrantë. Tani për tani kolegët nga Greqia e kontrollojnë atë numër, por sigurisht se ne kemi për detyrim ta ruajmë atë pikë kufitare, por edhe të parandalojmë mundësinë për hyrje në Maqedoninë e Veriut”,- deklaroi ministri i punëve të brendshme, Oliver Spasovski.

Numri i migrantëve të cilët tentojnë të hyjnë në Maqedoni është rritur. Vetëm vjet mbi 17 mijë migrantë u kthyen në Greqi. Por, institucionet sigurojnë se janë të gatshëm për t’u përballur me fluksin e migrantëve.

“Patrullojmë policë nga shumë shtete të Evropës së bashku me policët kufitarë të Maqedoninë së Veriut dhe mendoj se për dallim nga 2015, tani Maqedonia e Veriut, por edhe i gjithë rajoni, është i përgatitur shumë më shumë për përgjigje adekuate nëse paraqitet numër më i madh i migrantëve”,- tha Sashko Kocev nga “Marri”.

Por, edhe përkundër masave të marra në kufi, migrantët kërkojnë gjithnjë rrugë alternative. Vetëm një javë më parë u zbulua një grup prej pesë migrantësh nga Afganistani që lëviznin në zonën drejt fshatit Nikushtak, në komunën e Lipkovës.