Të paktën 19 vende njoftuan sot zotimin për t’i dhënë fund financimit jashtë shtetit të projekteve të karburanteve fosile pa teknika të kapjes së karbonit deri në fund të vitit 2022, përfshirë investitorët e mëdhenj, si SHBA-ja dhe Kanadaja.
“Investimi në projektet e lëndëve djegëse fosile të mbetura siç është mbart rreziqe sociale dhe ekonomike në rritje (…) dhe ka ndikime negative në të ardhurat e shtetit, punësimin lokal, taksapaguesit dhe shëndetin publik”, shkruajtën nënshkruesit në një deklaratë të përbashkët të lëshuar gjatë konferencës ndërkombëtare të klimës COP26, Glasgou.
Vendet e G20-s ranë dakord të ndalojnë mbështetjen e projekteve të termocentraleve me qymyr jashtë vendit.
Plani i shpallur sot, me iniciativën e Londrës, përfshin për herë të parë gazin dhe naftën dhe premton t’i ridrejtojë këto para drejt energjive të rinovueshme.
“Ne duhet të vendosim fondet publike në anën e duhur të historisë. Përfundimi i financimit ndërkombëtar për të gjitha këto projekte të karburanteve fosile është thelbësor, nëse duam të jemi në gjendje të ruajmë objektivin 1,5 gradë Celcius për ngrohjen globale”, tha Sekretari britanik i Shtetit për Sipërmarrjen, Greg Hands.
Sipas Agjencisë Ndërkombëtare të Energjisë (IEA), në mënyrë që të jetë në gjendje të ruajë objektivin prej +1,5 gradë Celcius, të gjitha financimet për projektet e reja të karburanteve fosile duhet të ndërpriten menjëherë./atsh
