Shërbimet e Ministrisë së Kulturës kundër Ministrisë së Kulturës

Sindikata e punonjësve të kulturës ka alarmuar sërish se të punësuar brenda shërbimeve të Ministrisë së Kulturës po kërcënojnë drejtorët e institucioneve të kulturës me kallëzim penal për keqpërdorim të buxhetit të shtetit, nëse përgatisin pagën për muajin mars me 12% rritje. Ata i apelojnë ministres të marrë masa dhe të parandalojë fenomene të tilla devijuese

Me prononcimin publik të dy ditëve më parë të ministres së Kulturës se rrogat e punonjësve në kulturë do të rriten me 12 për qind duke filluar nga maji mars, u duk sikur u mbyll debati i kohëve të fundit dhe akuzat për manipulim. Por Sindikata e punonjësve të kulturës ka alarmuar sërish se të punësuar brenda shërbimeve të Ministrisë së Kulturës po kërcënojnë drejtorët e institucioneve të kulturës me kallëzim penal për keqpërdorim të buxhetit të shtetit, nëse përgatisin pagën për muajin mars me 12% rritje sipas Kontratës Kolektive për Kulturën dhe Kontratës së Përgjithshme Kolektive për Sektorin Publik. Ata i apelojnë ministres të marrë masa në kohë në shërbimet e saj dhe të parandalojë fenomene të tilla devijuese që dëmtojnë reputacionin e saj.

Sindikata në njoftimin e saj thotë se këta individë kanë vite që punojnë aktivisht kundër zgjidhjes së çështjeve në kulturë, veçanërisht pas nënshkrimit të Marrëveshjes Kolektive për Kulturën.

“Me veprime të tilla cenojnë gjithë angazhimin e Ministres së Kulturës, e cila me punën e saj me përgjegjësi dhe transparente avokon për punonjësit e kulturës dhe që pas shtypit të djeshëm shpalli publikisht rritje 12% të pagave në kulturë. Kjo sjellje e individëve që do të detyrohemi ta shpallim publikisht me emrin dhe mbiemrin herës tjetër, jo vetëm që nuk ka kuptim por është edhe kundër ligjit. Si sindikatë do të detyrohemi të bëjmë kallëzim penal ndaj këtyre personave për nxitje të krimit dhe shpërdorim detyre, të dënueshme me ligj. Ne gjithmonë i kemi përkrahur punonjësit e Ministrisë së Kulturës në luftën e tyre për paga më të larta dhe ne gjithmonë kemi konsideruar se pagat e tyre janë të ulëta dhe në të ardhmen duhet të ngrihen në nivelin e zyrtarëve administrativë në institucionet kulturore”, thuhet në njoftim.

Sindikata e kulturës gjatë muajit mars ka reaguar publikisht në disa raste se vendimet për llogaritjen e pagave për muajin mars nuk janë në përputhje me Kontratën Kolektive për Kulturë dhe Kontratën e Përgjithshme Kolektive për Sektorin Publik nga shtatori 2023. Sipas Kontratës Kolektive për Kulturën, bazë për llogaritjen e pagës është paga minimale, ndërsa sipas Kontratës së Përgjithshme Kolektive për sektorin publik, paga bazë bruto e punonjësve në sektorin publik rritet me 10%. Të mërkurën ministrja Bisera Kostadinovska Stojçevska në konferencën për media me rastin e reagimit të Sindikatës ndaj pretendimit për mos rritje të pagave, tregoi se nuk ka ndryshim as në kontratën e përgjithshme kolektive, as në kontratën kolektive të sindikata. Ajo theksoi se ndryshimi i vetëm i futur në dispozitë është paga minimale. (koha.mk)