Prishtina vërshohet nga shiu i furishëm

Abedin Bilalli
Botuar nga Abedin Bilalli 14 Maj, 2024 19:35

Prishtina vërshohet nga shiu i furishëm

Reshjet e shiut pasditen e së martës, kanë shkaktuar telashe në kryeqytet.

Ndonëse nuk zgjatën shumë, reshjet shkaktuan puse me ujë, të cilat e bënë të pamundur kalimin e qytetarëve në pjesë të caktuara të qytetit.

Në disa fotografi dhe video që janë dërguar në redaksinë e Telegrafit, shihen rruga “B”, rruga “Rasim Kiqina” në lagjen Taslixhe, dhe rrugë të tjera të mbuluar nga ujërat atmosferike.

Duhet theksuar se Prishtina vazhdimisht ballafaqohet me probleme pas shirave.

Në shumë pjesë të qytetit mungojnë gypat për ujëra atmosferike dhe reshjet përfundojnë në gypa të ujërave të zeza.

Në mungesë të dy gypave, shumë lagje kanë telashe sa herë që ka reshje.

Sipas meteorologëve, në Kosovë mot kryesisht me vransira dhe reshjes shiu kohëpaskohe parashihen edhe ditën e mërkurë, me temperatura ndërmjet 16C e 18C.

Të enjten, sa me intervale me diell e sa me vransira, vende-vende me mundësi për ndonjë rigë lokale shiu.

Nga dita e premtë do të ketë më shumë intervale me diell, e temperaturat shënojnë rritje deri në 23C; të shtunën deri në 25C e 26C./Telegrafi/

Abedin Bilalli
Botuar nga Abedin Bilalli 14 Maj, 2024 19:35