Zekolli Shaqiri: Avancimi i infrastrukturës vendore, prioritetet për ne

Në kuadër të takimit të Komitetit të Punës, ku morën pjesë Sekretari i Përgjithshëm, Ambasadori i Sllovakisë dhe përfaqësuesit e UNDP-së, Zëvendësministrja e Transportit, Kaltrina Zekolli Shaqiri, vuri në dukje se avancimi i infrastrukturës vendore mbetet një ndër prioritetet kryesore të Ministrisë së Transportit.

Ajo theksoi rëndësinë e projekteve strategjike infrastrukturore që ndihmojnë në ndërlidhjen rajonale dhe përmirësojnë qasjen e vendit ndaj tregjeve evropiane dhe globale.

Zekolli Shaqiri veçoi si prioritet Korridorin 8 dhe 10 si dhe shum projekte të tjera kyçe, të cilat janë thelbësore për rritjen e efikasitetit të transportit dhe zhvillimin e qëndrueshëm. “Këto projekte jo vetëm që do të përmirësojnë cilësinë e jetës për qytetarët tanë, por gjithashtu do të pozicionojnë Maqedoninë e Veriut si një nyje transporti me rëndësi strategjike në rajon,” tha Zekolli Shaqiri.

Takimi shërbeu si një platformë për shkëmbimin e ideve dhe forcimin e partneriteteve ndërkombëtare për zhvillimin e mëtejshëm të infrastrukturës vendore.