FRASH i qëndron Taravarit: Strukturat rinore distancohen nga qëndrimi i Yllka Nuredinit
Botuar nga Flaka
Pas deklaratës së bujshme të kryetares së FRASH-it, Yllka Nuredini, e cila doli hapur në përkrahje të grupit të larguar nga partia, nuk ka vonuar reagimi i strukturave të tjera rinore brenda Forumit Rinor të Aleancës për Shqiptarët. Në një qëndrim të përbashkët, kryetarët e degëve të FRASH-it kanë shprehur qartë dhe pa ekuivoke distancimin e tyre nga veprimet individuale dhe kanë riafirmuar mbështetjen e plotë për kryetarin e partisë, Arben Taravari, shkruan Flaka.
“Jemi krenar për Aleancën për Shqiptarët dhe kryetarin e saj Arben Taravari, dhe nuk bëhemi palë me pushtetin, por qëndrojmë gjithmonë me popullin,” thuhet në deklaratën e përfaqësuesve rinorë.
Duke komentuar mbi largimin e disa ish-anëtarëve të partisë, përfaqësuesit e rinisë kanë qenë të qartë në mesazhin e tyre: “Të zgjedhësh favoret e qeverisë dhe të lesh Partinë quhet thjesht Tradhëti.” Me këtë mesazh ata kanë vënë theksin tek parimet e besnikërisë politike dhe qëndrueshmërisë në kohë sfidash.
Në deklaratë gjithashtu vihet re një unitet i thellë dhe një përgatitje e qartë për fazën e ardhshme politike: “Shihemi në Tetor. Deri atëherë ju urojmë Dinjitet.”
Ky reagim i shpejtë dhe i koordinuar i strukturave rinore të FRASH-it dëshmon se, pavarësisht zërave të izoluar, shumica e të rinjve qëndrojnë të angazhuar dhe të përkushtuar ndaj rrugës që ka ndjekur Aleanca për Shqiptarët nën drejtimin e Arben Taravarit.
Në ndërkohë, një deklaratë publike, kryetarja e Forumit Rinor të Aleancës për Shqiptarët (FRASH), Yllka Nuredini, ka shprehur hapur kundërshtimin ndaj qëndrimeve dhe bashkëpunimeve politike të udhëheqësisë aktuale të partisë, duke u pozicionuar qartazi përkrah Arben Fetait.
“Si kryetare e FRASH-it, bashkë me udhëheqësinë e Forumit dhe në konsultim të vazhdueshëm me të rinjtë dhe miqtë tanë, kemi qenë të qartë në kundërshtimin ndaj bashkëpunimeve që bien ndesh me kauzat dhe ideologjinë tonë,” shprehet Nuredini. Ajo theksoi se ky qëndrim është mbajtur me bindje, përgjegjësi dhe transparencë edhe në tryezat e vendimmarrjes brenda partisë.
Sipas saj, vendimi për të votuar për dalje nga Qeveria, megjithëse jo në formatin më të përshtatshëm, ishte i domosdoshëm pasi FRASH nuk kishte përfituar asgjë nga ajo marrëdhënie: “As të rinjtë, as vizioni ynë.”
Ajo nënvizon se aktualisht nuk është në pyetje pushteti, por idealizmi, duke theksuar se FRASH mbetet një nga zërat më të sinqertë dhe të drejtpërdrejtë në këtë parti.
“Kam kaluar një periudhë të vështirë përballë një dileme të ndjeshme. Njëra anë më kërkonte besnikëri, tjetra më kërkonte zë. Zgjodha zërin pa mohuar mirënjohjen për ata që më kanë formuar dhe udhëhequr,” deklaroi Nuredini, duke shtuar se “dashuria për liderin nuk duhet të na verbojë përballë arsyes që na bëri pjesë të kësaj partie.”
Në fund, ajo ritheksoi përkushtimin e saj ndaj idealit për ndryshim dhe shpalli hapur mbështetjen për Arben Fetain: “FRASH zgjedh të qëndrojë, të flasë dhe të veprojë në anën e Arben Fetait, duke ditur se ai është shembulli më domethënës i një posti të bartur me dinjitet dhe përkushtim të palëkundur.”
Por, përtej zërave të veçuar, rinia e Aleancës për Shqiptarët tregon se është e vendosur të mos lejojë që ideali i përbashkët të zëvendësohet nga interesat personale. Flaka Media
Botuar nga Flaka
TË fundit
