Pretendime për ndërtesë pa leje në Çair dhe presione politike ndaj Bujare Abazit
Botuar nga Flaka
Në rrjetet sociale po qarkullon informacion i pakonfirmuar që lidhet me Bujare Abazin, ish-anëtare e Aleancës për Shqiptarët, e cila së fundmi ka kaluar në pozicionin e drejtoreshës së Agjencisë për Letrat me Vlerë.
Sipas këtyre pretendimeve, një ndërtesë pesëkatëshe e cila po ngrihet në komunën e Çairit thuhet se është pronë e vëllait të saj. Ndërtesa dyshohet se po ndërtohet jashtë planit urbanistik, në një zonë që më herët ka qenë park publik.
Gjithashtu, në po të njëjtat burime jozyrtare, pretendohet se Abazi është larguar nga Aleanca për Shqiptarët dhe nga rreshti politik i Arben Taravarit për shkak të presioneve të supozuara nga kryetari i Çairit, Visar Ganiu, dhe Izet Mexhiti. Sipas këtyre pretendimeve, asaj i është kërkuar të largohet nga Taravari në të kundërtën ndërtesa e familjes së saj do të rrënohej.
Pas largimit të saj nga ASH, Bujare Abazi u emërua në një pozitë drejtuese shtetërore, çka ka nxitur reagime dhe komente të shumta në opinionin publik dhe rrjete sociale, ku ajo akuzohet për tradhti të parimeve dhe shfrytëzim të patriotizmit për interesa personale.
Duhet theksuar se deri tani nuk ka asnjë konfirmim zyrtar nga ndonjë prej palëve të përfshira, as për ndërtimin në fjalë, as për motivet e largimit të zonjës Abazi nga partia, dhe as për ndonjë presion të mundshëm politik. Informacionet e përhapura mbeten në nivel të thashethemeve dhe spekulimeve në rrjetet sociale dhe disa media online.
Botuar nga Flaka
TË fundit
