Ali Ahmeti: Nga UÇK-ja te Kryeministri – 23 vite BDI, përfaqësim dhe sfida të reja

Kryetari i Bashkimit Demokratik për Integrim, Ali Ahmeti, ka shënuar sot 23-vjetorin e themelimit të partisë së tij përkrah bashkëluftëtarëve, themeluesve, anëtarëve dhe qindra të rinjve që përfaqësojnë energjinë e re të subjektit politik, përcjell Flaka

“BDI lindi si vazhdim i një misioni të shenjtë, i asaj që e nisëm me Ushtrinë Çlirimtare Kombëtare dhe e kurorëzuam me Marrëveshjen e Ohrit,” deklaroi Ahmeti gjatë tubimit festiv.

Lideri i BDI-së theksoi se për më shumë se dy dekada, partia ka qenë faktor kyç në avansimin e statusit të shqiptarëve në Maqedoninë e Veriut. Ai nënvizoi se shqiptarët sot gëzojnë pozita që dikur dukeshin të paarritshme.

“Pozitat më të larta shtetërore që për dekada ishin të paarritshme për shqiptarët, sot janë realitet. Vetëm vitin e kaluar, përveç Kryetarit të Kuvendit, patëm edhe Kryeministrin shqiptar. E filluam nga zero dhe arritëm deri te Kryeministri,” tha Ahmeti.

Megjithatë, sipas tij, arritjet janë sot të rrezikuara nga tendencat për t’i zhbërë përfitimet e Marrëveshjes së Ohrit dhe përjashtimet sistematike të shqiptarëve.

“Sot, kur shqiptarët përballen me një realitet të dhimbshëm, me sulme ndaj Marrëveshjes së Ohrit, ndaj gjuhës shqipe, me përjashtime nga institucionet dhe mekanizmat e përfaqësimit, ne nuk do të heshtim,” deklaroi ai me tone të ashpra.

Ahmeti siguroi se BDI do të mbetet “gardiane e arritjeve shqiptare dhe mbrojtëse e çdo qytetari që beson në drejtësi, barazi dhe dinjitet”.

“Vazhdojmë bashkë, për fitore të reja dhe për dinjitetin që nuk negociohet,” përfundoi lideri i BDI-së, duke lënë të kuptohet se partia është në mobilizim të plotë për zgjedhjet e tetorit. Flala Media