Xhelili: Retorika e Mickoskit është konfrontuese, shqiptarët duhet të flasin qartë për integrimin në BE
Botuar nga Flaka
Deklaratat e fundit të kryeministrit të Maqedonisë së Veriut, Hristijan Mickoski, se “jemi duke luftuar si luanë për të mbrojtur identitetin”, janë interpretuar si një qasje tensionuese dhe konfrontuese ndaj procesit të integrimit evropian, veçanërisht në kontekstin e marrëdhënieve me Bullgarinë dhe zhvillimeve të fundit në Parlamentin Evropian.
Kështu vlerëson analisti politik Zudi Xhelili, i cili thekson se kjo retorikë përdoret me vetëdije të plotë për faktin se “nuk ekziston një plan B për Maqedoninë e Veriut”.
“Rruga drejt Bashkimit Evropian kalon përmes zbatimit të Propozimit Francez dhe ndryshimeve kushtetuese, që përfshijnë edhe njohjen e pakicës bullgare në Kushtetutë,” – thotë Xhelili.
Ai bën thirrje që partitë politike shqiptare të reagojnë qartë dhe pa ekuivoke, duke mos u bërë pjesë e lojërave identitare të cilat, sipas tij, “shfrytëzohen për konsum të brendshëm politik”.
“Shqiptarët janë thellësisht të përkushtuar ndaj integrimit në BE. Ata besojnë në Propozimin Francez, i cili është i vetmi real dhe funksional për vendin,” – thekson Xhelili.
Sipas tij, çdo vonesë apo devijim nga ky kurs është kundër interesave të të gjithë qytetarëve, përfshirë edhe vetë popullin shqiptar.
“Shqiptarët nuk duhet të bëhen peng i diskurseve nacionaliste që e largojnë vendin nga rruga drejt BE-së. Ata janë të orientuar drejt së ardhmes evropiane, që nënkupton reforma, bashkëjetesë, dhe respekt të marrëveshjeve ndërkombëtare,” – shton ai.
Në fund, Xhelili thekson se një qëndrim i qartë i faktorit shqiptar do të dërgonte një mesazh të fortë si brenda vendit, ashtu edhe në qarqet ndërkombëtare për angazhimin serioz të shqiptarëve në ndërtimin e një shteti demokratik dhe evropian. Flaka Media
Botuar nga Flaka
