Aksidente të rënda, arrestime për drogë dhe dhunë familjare në Maqedoninë e Veriut
Botuar nga Flaka
Maqedonia e Veriut është përballur me një ditë të ngarkuar në kronikën e zezë më 4 dhe 5 korrik 2025. Nga aksidente tragjike, te raste të dhunës në familje dhe aksione të policisë kundër narkotikëve, ngjarjet shënojnë një situatë alarmante në disa qytete të vendit.
Një i mitur humbi jetën në Kërçovë pas aksidenti me motoçikletë
Një 17-vjeçar nga Kërçova ka ndërruar jetë pasi u përplas me motoçikletën e tij “Hamachi” nga një veturë “Audi” në kryqëzimin mes rrugëve “Boris Kidriç” dhe “Mirko Mileski”. Ngjarja ndodhi më 4 korrik në orën 15:26, dhe i riu, me lëndime të rënda trupore, ndërroi jetë gjatë rrugës për në Klinikën “Nënë Tereza” në Shkup. Policia dhe Prokuroria kanë kryer hetime në vendngjarje.
Një 74-vjeçare e goditur nga veturë në fshatin Çajle të Gostivarit
Po të njëjtën ditë, në orën 19:00, një veturë “Opel Corsa” e drejtuar nga një 63-vjeçar goditi një grua 74-vjeçare në fshatin Çajle. Ajo pësoi lëndime të rënda trupore dhe u dërgua në Qendrën Mjekësore të Gostivarit.
Aksident i rëndë edhe në Petrovec
Në Petrovec të Shkupit, një 75-vjeçare që drejtonte një “Mercedes” u përplas me një motoçiklist 50-vjeçar, i cili përfundoi me lëndime të rënda në Klinikën “Nënë Tereza”.
Arrestime për vozitje në gjendje të dehur në Ohër
Dy shoferë në Ohër, një 24-vjeçar nga fshati Shum dhe një 43-vjeçar nga Ohri, u ndaluan për shkak se drejtonin automjete me më shumë se 1.6 promilë alkool në gjak. Ata përballen me kallëzim penal për “drejtim të rrezikshëm të automjetit”.
Seri arrestimesh për drogë në Shkup, Tetovë, Velës e Kërçovë
Pesë persona nga Shkupi u arrestuan në lokacione të ndryshme pasi iu gjetën substanca të dyshuara narkotike si marihuanë dhe pluhur i bardhë.
Në Çegran, Gjatë një kontrolli në një objekt hotelierik, u gjetën tre qese me substanca të panjohura dhe u arrestuan dy persona, 50 dhe 20 vjeç.
Gjithashtu, tre persona nga fshati Pallçisht u ndaluan në Novakë pasi u kapën me drogë. Po ashtu në Tetovë u ndalua një 18-vjeçar nga Shkupi, ndaj të cilit kishte urdhër arresti për një vepër penale nga Gjykata Themelore Shkup 1.
Në Velës, një 32-vjeçar u ndalua me pluhur të bardhë të dyshuar si drogë, ndërsa në Kërçovë u konfiskuan 137 bimë kanabisi në shtëpinë e një 54-vjeçari.
Rast dhune familjare në Radovish
Një 50-vjeçar në Radovish ka rrahur bashkëshorten dhe djalin e tij të mitur. Ata kanë pësuar lëndime të konstatuara nga mjekët. Rasti është nën hetim dhe ndaj agresorit pritet të ngrihet padi penale.
Denoncime për largim të të miturve nga shtëpia në Shkup dhe Kumanovë
Një 14-vjeçare është raportuar si e zhdukur nga nëna e saj në Kumanovë. Policia ka filluar kërkimet për gjetjen e saj. Ndërkohë, një tjetër 14-vjeçar që ishte raportuar si i larguar nga një institucion për fëmijë, është kthyer vetë në objekt dhe është nën përkujdesje. Flaka Media
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
