VLEN – Saraj, Pishina publike po shndërrohet në pronë private
Botuar nga Flaka
Lëvizja VLEN ka reaguar sot ndaj një ndërtimi të dyshimtë në qendrën rekreative sportive në Saraj, duke akuzuar Komunën për mungesë totale transparence dhe zhvillim të aktiviteteve ndërtimore pa dokumentacion ligjor.
“Në Komunën e Sarajit po vazhdohet me ndërtime që zhvillohen në mënyrë të fshehtë dhe pa dokumentacionin përkatës ligjor”, – deklaron VLEN në reagimin e publikuar.
Bëhet fjalë për ish-pishinën publike, e cila sipas VLEN, në vitin 2023 kaloi nga pasuri shtetërore në pronësi të Komunës së Sarajit, si rezultat i një vendimi të qeverisë së atëhershme të përbërë nga BDI dhe LSDM.
“Dëshiroj të informoj opinionin publik se në Saraj është duke u ndërtuar apo rindërtuar një objekt që dikur ishte pasuri publike, pronë e përbashkët e të gjithëve, ndërsa sot është shndërruar në pronë private”, – theksohet në deklaratë.
Pa leje ndërtimi, pa tabelë informuese, pa transparencë
VLEN thekson se në terren mungon çdo informacion zyrtar:
- Nuk ka tabelë informuese
- Nuk është i ekspozuar numri i lejes ndërtimore
- Nuk ka të dhëna për investitorin
- Nuk është dhënë asnjë njoftim publik
“Gjithçka po bëhet në fshehtësi të plotë,” – akuzon VLEN.
Pyetje të drejtpërdrejta për Komunën e Sarajit
Lëvizja kërkon nga Komuna e Sarajit të japë përgjigje të menjëhershme për çështje kyçe:
- Cila kompani po ndërton objektin?
- Kush është investitori dhe si po financohet ndërtimi?
- Në çfarë baze ligjore po ndërtohet?
- Kur është marrë vendimi për ndërtim?
Heshtje nga Qyteti i Shkupit dhe akuzë për mbrojtje politike
VLEN akuzon edhe Qytetin e Shkupit për bashkëpjesëmarrje përmes mosveprimit:
“Qyteti i Shkupit, si çdoherë kur bëhet fjalë për interesa të kryetarit aktual të Sarajit dhe eprorit të tij, Blerim Bexheti, vazhdon të heshtë,” – thuhet në deklaratë.
“Në të gjitha rastet që lidhen me Blerim Bexhetin, Qyteti i Shkupit sillet sikur nuk është kompetent për mbikëqyrje, inspektim apo për çështje që kanë të bëjnë me tokën ndërtimore dhe ndërtime të paligjshme.”
Kërkesa për inspektim urgjent dhe publikim të dokumentacionit
Në fund, VLEN kërkon:
- Publikim të menjëhershëm të gjithë dokumentacionit dhe informacionit zyrtar nga Komuna e Sarajit.
- Kontroll të plotë inspektues nga Qyteti i Shkupit dhe informim transparent të opinionit publik.
“Të gjitha institucionet duhet të veprojnë me përgjegjësi. Heshtja nuk është zgjidhje kur bëhet fjalë për pasurinë publike,” – përfundon reagimi. Flaka
Botuar nga Flaka
