Vijojnë reagimet pas presionit policor ndaj gazetarit të portalit Tetova Sot
Botuar nga Flaka
Pas tentativës për presion ndaj gazetarit Nevrij Ademi nga portali Tetova Sot, figura të njohura publike kanë reaguar ashpër, duke mbrojtur lirinë e fjalës dhe punën profesionale të mediave.
Bajram Rexhepi theksoi:
“Presioni policor ndaj gazetarit Nevrij Ademi, është një akt i turpshëm dhe skandaloz ndaj fjalës së lirë. Është një akt dëshpërimi i njerëzve, që dinjitetin politik e kanë në nivelet më të ulëta të mundshme. Është fundi i një epoke turpi, që po na njollos keq si komb.”
Ndërsa Jeton Shaqiri deklaroi:
“Fjala e lirë nuk ndalet me presion e as me frikë. Çdo tentim për të mbytur zërin e mediumeve është shenjë e mendësisë diktatoriale dhe dëshmi e mungesës së guximit për transparencë. Sot jemi të gjithë me Nevrij Ademi dhe Tetova Sot – sepse kur sulmohet fjala e lirë, preket e drejta e secilit prej nesh. Mbështetje e plotë për mediumet dhe gazetarët që nuk heshtin!”
Po ashtu, Isen Shabani shtoi:
“Gazetarët janë një urë e rëndësishme mes qytetarëve dhe institucioneve. Portali Tetova Sot është shembull i punës profesionale dhe të përgjegjshme, duke informuar opinionin publik me saktësi dhe transparencë. Respekti për median dhe fjalën e lirë është themel i demokracisë sonë.”
Këto reagime vijnë në një moment kritik për lirinë e medias në Tetovë dhe shërbejnë si mbështetje publike për gazetarët që veprojnë pa frikë dhe me përgjegjësi profesionale. Flaka Media
Botuar nga Flaka
TË fundit
