BDI: Shqiptarët vetë do të zgjedhin përfaqësuesit e tyre, jo Mickoski dhe veglat e tij

Botuar nga Flaka 22 Shtator, 2025 10:29

BDI ka reaguar ashpër ndaj zhvillimeve politike në vend, duke e akuzuar koalicionin VLEN për mungesë të plotë të zërit politik dhe për nënshtrim ndaj partnerit të tyre, VMRO-DPMNE-së.

“As Mickoski, as vegla e tij VLEN, shqiptarët vetë do të vendosin për përfaqësuesit e tyre,” – thuhet në reagimin e BDI-së.

Sipas kësaj partie, VLEN çdo ditë e më shumë po e dëshmon gjendjen e vet të mjerueshme politike: pa zë, pa legjitimitet dhe të nënshtruar ndaj VMRO-së.

“Ata nuk guxojnë të flasin për asnjë çështje të madhe kombëtare. Kryeministri i qorton publikisht sa herë që guxojnë të prekin tema madhore, duke ua kujtuar se janë aty vetëm për kanalizime dhe mbeturina,” – thuhet më tej në deklaratë.

BDI akuzon VLEN se ka heshtur për një sërë çështjesh me rëndësi madhore për shqiptarët:

iniciativën e VMRO-së në Gjykatën Kushtetuese kundër ligjit për gjuhën shqipe,
heqjen e balancuesit si mekanizëm mbrojtës për përfaqësim të drejtë në administratë,
mosndëshkimin dhe më pas avancimin e policit që përdhosi flamurin shqiptar në Kumanovë,
hapjen e debatit për shfuqizimin e votimit me Badenter në Kuvend.

Në vend të mbrojtjes së interesave të shqiptarëve, sipas BDI-së, VLEN zgjedh heshtjen dhe nënshtrimin.

“Shefi i shtabit të tyre, Adnan Azizi, madje kërkoi falje te Mickoski dhe u justifikua publikisht se nuk kishte në mendje të ndalonte projektet sllave e ruse, por se thjesht kishte kritikuar një shqiptar. Ky është imazhi i vërtetë i VLEN-it: vasalë të përulur përballë të huajve, por të guximshëm vetëm kur bëhet fjalë të sulmojnë shqiptarë,” – thekson BDI.

Deklarata vë në dukje se VLEN nuk reagoi as ndaj partnerit të vogël të Mickoskit, ZNAM, që sipas BDI-së, i fyen dhe i poshtëron hapur shqiptarët.

“Edhe kur Izet Mexhiti u trajtua publikisht me përçmim – ‘mos u sill si Liza në botën e çudirave’ – ai zgjodhi të heshtë. Ky është turpi më i madh që ndonjëherë një parti shqiptare i ka sjellë shqiptarëve,” – vijon reagimi.

Në përfundim, BDI e quan 19 tetorin një referendum të shqiptarëve për dinjitetin dhe përfaqësimin e tyre.

“Prandaj, shqiptarët janë mobilizuar dhe më 19 tetor në referendum do të flasin me një zë: përfaqësuesit e shqiptarëve i zgjedhin vetë shqiptarët, jo Mickoski, jo VMRO dhe jo veglat e tyre. Dinjiteti i shqiptarëve do të rikthehet vetëm me Aleancën Kombëtare për Integrim. Sepse shqiptarët meritojnë të kenë përfaqësues të lirë, të denjë dhe të pathyeshëm, jo krijesa politike artificiale të VMRO-së.” Flaka

Botuar nga Flaka 22 Shtator, 2025 10:29

Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Marrja e paautorizuar e teksteve dhe videove me të drejtë autoriale ose ndonjë përmbajtje të ngjashme pa pëlqimin paraprak me shkrim të Flaka Media do të konsiderohet shkelje e të drejtave autoriale dhe për këtë Flaka e ruan të drejtën të kërkojë kompensim përkatës monetar.Mosrespektimi dhe abuzimi i të drejtave autoriale dhe të drejtave simotër dënohet me ligj.Çdo marrje e paautorizuar, shfrytëzim, përdorim apo publikim i tekstit, fotografitë ose videot apo çfarëdo përmbajtje tjetër e ngjashme që paraqet pronësi të Flaka Media, pa pëlqim paraprak me shkrim nga redaksua, ndalohet rreptësisht dhe për të njëjtën paguhet kompensim përkatës financiar, për çka pronari ka të drejtë të nis procedurë përkatëse.Në rast të marrjes së teksteve autoriale dhe videove apo çfarëdo përmbajtje tjetër, në mënyrë të obligueshme nevojitet pëlqim paraprak nga Flaka Media dhe vendosje të linkut që do të çojë deri në web faqen e Flaka Media. Shkrimet nga MGID, nuk janë në menaxhim të redaksisë.