Toyota GR, nga hatchback te supermakina dhe SUV
Botuar nga Drin Zenku
Zhvillimi i një makine sportive të dedikuar është një sfidë e madhe për çdo prodhues, por Toyota duket e vendosur të ecë përpara. Pas bashkëpunimeve të suksesshme me Subaru për GR86/BRZ dhe me BMW për Supra/Z4, kompania më e madhe e makinave në botë po sinjalizon se është gati të ndërtojë një model sportiv krejtësisht të pavarur.
Shefi i shitjeve dhe marketingut të Toyota Australia, Sean Hanley, deklaroi për revistën Drive se Toyota ka kapacitetin për të zhvilluar një makinë sportive të markës Gazoo Racing (GR) pa partnerë të jashtëm. “Po, po dhe po. Do të duhet të prisni dhe të shihni”, u shpreh ai, duke lënë të hapur mundësinë për një projekt të ri ambicioz.
Ndërkohë, Toyota po përgatit rikthimin e Celica-s, ndërsa koncepti elektrik FT-Se pritet të debutojë pas vitit 2026. Po ashtu, Supra aktuale do të dalë nga prodhimi vitin e ardhshëm, por kompania ka premtuar se emri legjendar do të rikthehet.
Spekulimet për një model sportiv të nivelit fillestar, të pozicionuar poshtë GR86, janë gjithashtu të gjalla. Koncepti S-FR, i prezantuar një dekadë më parë, mund të shërbejë si frymëzim për një makinë të re të përballueshme.
Në anën tjetër, Toyota po zhvillon një motor të ri 2.0 litra turbo që mund të bëhet baza e linjës GR, ndërsa në rangun më të lartë, Lexus LFR pritet të vijë me një motor V8 hibrid.
Për momentin, modelet ekzistuese si GR Yaris dhe GR Corolla mbeten sukseset më të mëdha, pasi bazohen mbi platforma të njohura dhe të shitura gjerësisht, duke e bërë më të lehtë justifikimin financiar. Shefi i Gazoo Racing, Tomoya Takahashi, ka lënë të kuptohet se një SUV GR mund të jetë “i domosdoshëm” për të ardhmen.
Flaka
Botuar nga Drin Zenku
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
