“Baba Dimri i sjell Kosovës zgjedhje të reja për Vit të Ri”

Baba Dimri i sjell Kosovës zgjedhje të reja për Vit të Ri. Presidentja e Kosovës, Vjosa Osmani, ia ka mbajtur ‘zhagun’ edhe kësaj radhe Vetëvendosjes.

Ajo e ka caktuar datën 28 dhjetor për zgjedhje, atë të cilën e kërkoi VV-ja.

“Data 21 dhjetor është datë shumë e afërt, ka procedura, tenderë. Andaj e kam vlerësuar datën 28 dhjetor”, tha ajo.

Ndonëse e para e shtetit ka vendosur datën e propozuar nga VV-ja, ajo ka mohuar se ka mbajtur anën partisë në pushtet për caktimin e datës së zgjedhjeve.

Ajo ka treguar së në vitin 2021 kishte vendosur kundër propozimit të Albin Kurti për shtyrje të datës së zgjedhjeve lokale.

“Siç kanë thënë disa njerëz shumë par nesh e shumë më të mençur se ne: nëse askush nuk të akuzon për asgjë, atëherë nuk ke qëndruar për asgjë. Në vitin 2021 kur partia në pushtet që kishte më shumë se 50 për qind të votave kërkonin që unë ta shtyja datën e zgjedhjeve lokale dhe kishim një opozitë shumë më të vogël se që është sot, unë vendosja në favor të kërkesës së opozitës që mos të shtyhej data e zgjedhjeve lokale, sado që kisha të drejt kushtetuese a bëjë një gjë të tillë. Edhe pse e zgjodha datën e favorshme për opozitën prapë u akuzova se po koordinohem dhe po ia bëj qefin Kurti”, ka thënë Osmani.

Presidentja Vjosa Osmani ka treguar pse ia dha të drejtën Glauk Konjufcës si mandatar i dytë për të formuar qeverinë në këtë mandat.

Në një konferencë për media, ajo ka thënë se nuk i ka rënë pishman për një gjë të tillë.

Sipas saj, Konjufca ka qenë shumë afër formimit të Qeverisë.

“Sa i përket Glauk Konjufcës, ditën kur është kërkuar mandati, unë kam pasur një takim me të. Ai me ka informuar qartë se me kë është duke biseduar dhe unë e kam thënë publikisht se fjala është për deputet individual. Ai ka qenë vetëm pak vota larg votimit të qeverisë dhe kushtetuta kërkon që t`i jepet mandati atij ose asaj që i ka gjasat dhe jo garancat. Pra, dikush që vjen deri të 56 dhe tregon qartë se me kënd është duke biseduar për të arritur 61-shin, i ka gjasat. Me tregoni ju kush ka qenë kandidati tjetër me gjasa më të medha?”, ka thënë Osmani.