Mickoski sërish tritika ndaj Gjykatës Kushtetuese dhe vendimit për pensionet

Në seancën e sotme të Kuvendit kushtuar pyetjeve të deputetëve, Kryeministri Hristijan Mickoski iu përgjigj një sërë pyetjesh që lidhen me reformën në gjyqësor dhe pagat e punonjësve të kësaj fushe, duke paralajmëruar se propozimet aktuale për ndryshime ligjore kërkojnë mjete “praktikisht të pamundura” për t’u siguruar nga buxheti.

Mickoski tha se sipas propozimeve që qarkullojnë, financimi për gjykatat duhet të arrijë në 0,8% të BPV-së, ndërsa për prokuroritë në 0,5%, ose rreth 1,5% e BPV-së gjithsej. Ai shpjegoi se me BPV-në e parashikuar për vitin 2026 prej 20,5–20,6 miliardë dollarësh, kjo do të kërkonte 260–270 milionë dollarë për gjyqësorin – “tre deri në katër herë më shumë se tani”.

Kreu i Qeverisë theksoi se duke pasur parasysh shpenzimet për pensionet, administratën, ushtrinë, investimet kapitale dhe borxhin mbi 2,2 miliardë euro, një rritje e tillë e financimit do ta çonte buxhetin në 8–9 miliardë euro në anën e shpenzimeve, me deficit 8–10% të BPV-së. “Natyrisht, kjo nuk është e mundur”, tha ai.

“Debati nuk mund të reduktohet vetëm në para”

Mickoski kritikoi faktin që debati publik për reformën në gjyqësor është fokusuar vetëm në çështjen e pagave.

“Më vjen keq që debati reduktohet vetëm për para. Reformat nuk janë vetëm buxhet autonom dhe paga,” u shpreh kryeministri, duke shtuar se pas reagimeve të publikut, disa grupe “kanë zhvendosur tezën” duke pretenduar mungesë kushtesh teknike si kompjuterë, daktilografë apo asistentë.

Ai tha se Qeveria nuk ka asnjë kundërshtim që planet për punësime dhe avancime t’i miratojnë vetë Këshilli Gjyqësor dhe Këshilli i Prokurorëve Publikë, madje as që të mos e njoftojnë fare Qeverinë.

Mickoski: Nëse i pranojmë kërkesat, Maqedonia do të ishte rekorder botëror

Kryeministri citoi të dhënat e Këshillit të Evropës, sipas të cilave Maqedonia e Veriut aktualisht shpenzon 0,39% të BPV-së për gjyqësorin – mbi mesataren e vendeve të Këshillit të Evropës dhe 75% mbi mesataren e BE-së.

“Po të pranonim rritjen e kërkuar, do të ndanim 2,5 herë më shumë se vendi që ndan më shumë në botë,” theksoi ai.

Ai shtoi se Shqipëria shpenzon 0,14%, Moldavia 0,18%, ndërsa Maqedonia 0,30% vetëm për gjykatat, dyfish mbi disa vende fqinje.

Megjithatë, Mickoski tha se Qeveria është e gatshme të pranojë rritje graduale, duke propozuar 0,1% të BPV-së si minimum ligjor për prokuroritë.

Kryeministri rikujton rastin PSP dhe “çantën Louis Vuitton”

Mickoski përmendi edhe rastin e Prokurorisë Speciale, duke thënë se pagat të jashtëzakonshme të disa prokurorëve “nuk sollën drejtësi”.

“Ata merrnin paga 10 herë më të larta se mesatarja, shkruanin ditarë që i rrisnin edhe 20–30 herë më shumë, dhe në fund miliona euro përfunduan në një çantë Louis Vuitton,” tha ai.

Kritika ndaj Gjykatës Kushtetuese dhe vendimit për pensionet

Kryeministri konfirmoi se Gjykata Kushtetuese ka shqyrtuar nismën për shfuqizimin e rritjes lineare të pensioneve dhe se, sipas informacioneve të tij, gjykatësja Dobrila Kacarska tashmë e ka nënshkruar vendimin për shfuqizim.

“Kjo nënkupton se 70% e pensionistëve do të marrin pension më të ulët muajin e ardhshëm,” tha Mickoski.

Ai e quajti vendimin “të padrejtë”, duke theksuar se pensionistët me pensione të ulëta janë viktima të procesit të tranzicionit.

“Qëllimi i rritjes lineare ishte ulja e varfërisë dhe ngritja e standardit të pensionistëve,” u shpreh ai.

Mickoski tha se do të ishte paradoksale që, në të njëjtën kohë, Gjykata Kushtetuese të vendosë edhe heqjen e ngrirjes së pagave të gjyqtarëve dhe prokurorëve.

“Pensionistëve u hiqet e drejta, ndërsa një grushti gjyqtarësh dhe prokurorësh u zhbllokohen pagat. Kjo është padrejtësi,” deklaroi ai.

Përfundimi

Kryeministri Mickoski tha se Qeveria nuk ka problem të diskutojë për reforma, por ato duhet të jenë të qëndrueshme financiarisht dhe të bazuara në parim.

“Nuk kemi aq para sa kërkojnë. Dhe ajo që do t’u ofrojmë do të jetë e mjaftueshme për paga të mira dhe shumë mbi mesataren,” përfundoi ai.