Paralajmërimet mjekësore u injoruan: Rinovimi i Mendy-t cilësohet si gabim
Botuar nga Drin Zenku
Situata e Ferland Mendy te Real Madridi ka marrë një kthesë të papritur vetëm pak muaj pas rinovimit të kontratës së tij. Sipas raportimeve, vendimi për zgjatjen e bashkëpunimit me mbrojtësin francez erdhi drejtpërdrejt me kërkesë të trajnerit Carlo Ancelotti, menjëherë pas triumfit të “Los Blancos” në Ligën e Kampionëve 2024.
Megjithatë, burime pranë klubit bëjnë të ditur se stafi mjekësor kishte paralajmëruar drejtuesit se rinovimi përbënte një rrezik serioz. Vlerësimet mjekësore kishin nxjerrë në pah problemet e vazhdueshme muskulore të Mendyt, me një nga ekspertët që kishte shkuar deri aty sa ta cilësonte “një mrekulli” faktin që lojtari ishte ende në gjendje të luante futboll në nivel profesional.
Vetëm disa muaj pas rinovimit, Real Madridi thuhet se ka filluar të pendohet për këtë vendim. Klubi ka angazhuar disa agjentë të besuar për të kërkuar oferta për Mendy-n, duke qenë i vetëdijshëm se interesimi në treg është i kufizuar për shkak të historisë së tij me dëmtimet.
Edhe pse kanë mbërritur disa oferta për shërbimet e mbrojtësit francez, asnjëra prej tyre nuk i ka përmbushur pritshmëritë ekonomike të klubit madrilen. Si pasojë, Real Madridi po shqyrton alternativa të ndryshme për ta shitur Ferland Mendy-n përpara skadimit të kontratës së tij, në mënyrë që të shmangë një humbje financiare dhe të hapë rrugë për përforcime të reja në krahun e majtë të mbrojtjes.
Flaka
Botuar nga Drin Zenku
TË fundit
