Samsung paralajmëron rritje çmimesh për smartfonët
Botuar nga Drin Zenku
Samsung ka paralajmëruar se rritja e çmimeve të smartfonëve mund të jetë e pashmangshme, për shkak të presioneve të forta ekonomike dhe kostove në rritje të prodhimit.
Deklarata u bë nga TM Roh, Co-CEO i divizionit mobil të Samsung, gjatë panairit CES 2026, ku ai pranoi se kompania po përballet me një nga situatat më të vështira të çmimeve në vitet e fundit.
Sipas Roh, Samsung është duke bashkëpunuar ngushtë me partnerët e zinxhirit të furnizimit për të zbutur ndikimin e kostove në rritje, të cilat po prekin jo vetëm smartfonët, por edhe televizorët dhe pajisjet e tjera inteligjente. Ndërkohë, kreu global i marketingut të kompanisë, Wonjin Lee, i tha Bloomberg se Samsung po shqyrton mundësinë e një “ripozicionimi të çmimeve” për t’iu përshtatur realitetit të ri ekonomik.
Edhe pse Samsung ishte prodhuesi më i madh i çipave në vitin 2024, kompania humbi kryesimin në tregun e memorieve gjatë vitit 2025 ndaj SK Hynix, çka ka ndikuar në furnizimin e divizionit të smartfonëve dhe ka shtuar presionin mbi kostot.
Në këtë kontekst, lansimi i Galaxy S26 shihet si një moment vendimtar për kompaninë, veçanërisht pas suksesit të madh të iPhone 17. Për të ruajtur konkurrueshmërinë, Samsung po konsideron ngrirjen e çmimeve të Galaxy S26 në disa tregje, pavarësisht sfidave financiare.
Paralelisht, gjiganti korean synon të dërgojë në treg rreth 400 milionë pajisje të pajisura me inteligjencë artificiale gjatë këtij viti, duke dyfishuar ekosistemin Galaxy AI dhe duke e vendosur AI-në në qendër të strategjisë së tij afatgjatë.
Flaka
Botuar nga Drin Zenku
TË fundit
