Muriqi shkruan histori te Mallorca: “Hat-trick” pas 18 vitesh dhe dedikim prekës për babain
Botuar nga Drin Zenku
Vedat Muriqi ka hyrë në historinë e Mallorcas, duke u bërë lojtari i parë i këtij klubi që realizon “hat-trick” në La Liga pas plot 18 vitesh. Sulmuesi kosovar shënoi tri gola në fitoren dramatike 3:2 ndaj Athletic Bilbaos, në ndeshjen e zhvilluar të shtunën mbrëma.
Sipas të përditshmes spanjolle “AS”, lojtari i fundit i Mallorcas që kishte shënuar tre gola në një ndeshje kampionati ishte Dani Guiza, në vitin 2008. Me paraqitjen e tij të jashtëzakonshme, Muriqi i dha fund një pritjeje të gjatë dhe hyri në listën e ngushtë të futbollistëve që kanë arritur këtë sukses me fanellën e klubit nga ishulli.
Pas përfundimit të ndeshjes, Muriqi bëri një deklaratë emocionuese, duke zbuluar se “hat-trick”-un ia kishte dedikuar babait të tij të ndjerë.
“Ia dedikoj këtë ‘hat-trick’ babait tim, i cili po të ishte gjallë sot do të festonte ditëlindjen. Djali im mban emrin e tij. Ai ka ndërruar jetë kur unë isha vetëm shtatë vjeç”, ka deklaruar Muriqi.
Ky ishte vetëm hera e 12-të në histori që një lojtar i Mallorcas realizon “hat-trick” në La Liga, duke e bërë arritjen e Muriqit edhe më të veçantë.
Performanca e tij është pritur me entuziazëm nga tifozët dhe mediat spanjolle, të cilat e kanë vlerësuar si një nga paraqitjet më mbresëlënëse të këtij sezoni për Mallorcan.
Flaka
Botuar nga Drin Zenku
TË fundit
Provimi i jurisprudencës dhe gjuha shqipe – një test për ligjin dhe përgjegjësinë institucionale
