Epilogu: Janë konfiskuar 27 tonë mari’huanë në aksionin e djeshëm në Maqedoninë e Veriut | VIDEO
Botuar nga Flaka
Një operacion i gjerë i Ministrisë së Punëve të Brendshme në Maqedoninë e Veriut ka çuar në sekuestrimin e rreth 27 tonëve marihuanë, në kuadër të një hetimi që lidhet drejtpërdrejt me një rast të mëparshëm kontrabande drejt Serbisë, transmeton Gazeta Flaka
Sipas autoriteteve, hetimi ka nxjerrë në pah dyshime serioze për keqpërdorim të licencave për prodhimin e kanabisit mjekësor, me fokus të veçantë kompaninë “Alfafarm” SHPK Shkup. Rasti ka hapur një debat të gjerë mbi boshllëqet dhe dobësitë në mekanizmat shtetërorë të mbikëqyrjes së këtij sektori të ndjeshëm.
Gjatë operacionit janë konfiskuar sasi rekord droge në dy lokacione kryesore. Në zonën e ish-kompleksit industrial OHIS në Shkup, policia zbuloi rreth 10 tonë marihuanë të depozituara në ambiente të një kompanie private, ndërsa në rajonin e Strumicës, në një aksion paralel, u sekuestruan edhe rreth 18 tonë të tjera.
Aksioni u zhvillua me angazhim të gjerë operacional, duke përfshirë dhjetëra automjete policore, kamionë transporti dhe njësi speciale. Mbështetje logjistike ofroi edhe Drejtoria e Doganave, ndërsa ekipet mjekësore ishin të pranishme për siguri dhe asistencë gjatë procedurave në terren.
Në qendër të hetimit është kompania “Alfafarm” SHPK Shkup, e regjistruar në vitin 2023 me kapital fillestar prej rreth 529 mijë eurosh. Edhe pse kompania ishte e pajisur me licencë për kultivimin dhe përpunimin e bimëve për qëllime farmaceutike, të lëshuar në vitin 2024, autoritetet dyshojnë se një pjesë e konsiderueshme e prodhimit është devijuar drejt tregut ilegal. Të dhënat nga Regjistri Qendror tregojnë ndryshime të pazakonta në pronësinë e kompanisë, të kryera vetëm pak ditë para zbulimit të dërgesës së paligjshme në Serbi.
Hetimi lidhet drejtpërdrejt me rastin e 29 janarit 2026, kur autoritetet serbe, pranë fshatit Konjuh afër Krushevcit, konfiskuan rreth 5 tonë marihuanë, me vlerë të vlerësuar nga 7 deri në 10 milionë euro. Droga ishte kamufluar si eksport i kastravecëve, ndërsa në mesin e të arrestuarve në Serbi ndodhet edhe një nga pronarët e “Alfafarm”. Institucionet serbe konfirmuan se dërgesa kishte origjinë nga Maqedonia e Veriut, gjë që çoi në intensifikimin e bashkëpunimit ndërinstitucional mes dy vendeve përmes Prokurorive përkatëse.
Sipas burimeve hetimore, ky korridor kontrabande ishte nën vëzhgim prej muajsh dhe zbulimi i magazinave në Shkup dhe Strumicë konsiderohet si kulmi i një hetimi të gjatë dhe të koordinuar ndërkufitar. Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
