Nëna e Heroit Afrim Zhitia nderohet nga Konsullata e Kosovës në Cyrih
Botuar nga Flaka
Nëna Qamile Zhitia, Nëna e Heroit të Kombit Afrim Zhitia.
Kudo që shkon Nëna, çdo institucion që viziton – kombëtar e shtetëror, politik, diplomatik, ushtarak, policor – në Kosovë, në Shqipëri, në Maqedoninë e Veriut dhe kudo ku drejtojnë shqiptarët, ajo është pritur, pritet dhe duhet të pritet edhe në të ardhmen me nderime të larta kombëtare e shtetërore, ushtarake e policore, politike e patriotike.
Nëna Qamile Zhitia qëndron në kolonën e pathyeshme të Nënave të Mëdha të Kombit, aty ku shekujt nuk fshijnë emra dhe historia i ruan në kujtesën e saj të përjetshme.
Për Nënën Qamile kemi thënë edhe herëve të kaluara dhe do ta përsërisim gjithmonë: ajo qëndron përkrah Nënave të mëdha të kombit, që nga Nëna Vojsavë e Skënderbeut e deri te Nënat e tjera të mëdha, si betim i përjetshëm.
Nëna Qamile Zhitia është Nënë legjendë, është Nënë monument. Është Nënë që e ktheu dhimbjen në forcë dhe forcën në nderim të flamurit të Kombit – flamurin që ia qendisi djalit të saj në gjoks, tash Hero i Kombit Afrim Zhitia; flamur në të cilin u betua djali i saj dhe me të cilin u mbështoll kur u mbulua me dheun e Atdheut.
Kjo Nënë e madhe i dha kombit tonë një bir që u bë epokë: Heroin e Kombit Afrim Zhitia, luftëtarin që ra me armë në dorë dhe me emrin e Atdheut në gojë, por që nuk u mposht kurrë, sepse ishte lindur nga një Nënë që nuk dinte të thyhej, të mposhtej apo të dorëzohej.
Nëpër shekuj, kombi ynë ka mbijetuar falë shpirtit të Nënave të mëdha e heroinave, sepse ato lindën trimërinë dhe e rritën me dinjitet.
Në panteonin e pavdekshëm të Nënave të Kombit, emri i Nënës Qamile Zhitia qëndron i gdhendur në gurin e përjetësisë, sepse luftës për liri dhe çlirim të Kosovës nga Serbia pushtuese ia dha njërin prej udhëheqësve më të mëdhenj – Heroin e Kombit Afrim Zhitia.
Me pritjen e Nënës Qamile, Konsulli i Kosovës në Cyrih ka ngritur lart dinjitetin e shtetit të Kosovës, ka nderuar historinë kombëtare dhe Lëvizjen Popullore të Kosovës, të cilës i ka prirë Heroi i Kombit Afrim Zhitia, duke dëshmuar fisnikëri personale dhe përgjegjësi shtetërore.
Duke e pritur dhe nderuar Nënën e Heroit të Kombit, Konsulli i Kosovës ka nderuar jo vetëm një figurë madhore të Nënës shqiptare, por edhe vetë shtetin e Kosovës dhe rolin e tij si përfaqësues shtetëror.
Ismet Sylejmani
Prishtinë, 8 shkurt 2026
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
