“Dushi në errësirë”, trendi i ri që premton gjumë më të mirë

Një trend i ri që po qarkullon në rrjetet sociale, i quajtur “dush në errësirë”, po tërheq vëmendjen e atyre që kanë vështirësi me gjumin. Ideja është e thjeshtë: të bëni dush me dritat e fikura ose të zbehura, zakonisht para gjumit, si pjesë e rutinës për t’u qetësuar.

Shumë persona raportojnë se kjo praktikë ndihmon në uljen e stresit dhe përmirësimin e cilësisë së gjumit. Ndryshe nga dushi i mëngjesit që synon t’ju zgjojë dhe t’ju japë energji, dushi në errësirë ka për qëllim të ulë ekspozimin ndaj dritës, të ndihmojë në rregullimin e temperaturës së trupit dhe ta përgatisë organizmin për pushim.

Sipas neuroshkencëtares Chelsie Rohrscheib, një dush i ngrohtë para gjumit mund të jetë i dobishëm sepse trupi ka nevojë për një ulje të lehtë të temperaturës për të fjetur. Uji i ngrohtë e rrit përkohësisht temperaturën e trupit, por pasi dilni nga dushi, temperatura bie shpejt, duke imituar procesin natyral që ndodh para gjumit dhe duke e ndihmuar trurin të kalojë më lehtë në fazën e gjumit.

Një tjetër faktor kyç është melatonina – hormoni që rregullon ciklin gjumë–zgjim. Errësira nxit prodhimin e melatoninës, ndërsa drita e fortë e pengon atë. Prandaj, reduktimi i dritës në mbrëmje i dërgon trupit sinjalin se është koha për të fjetur.

Përfitimet për shëndetin mendor

Ekspertët theksojnë se kjo praktikë mund të ketë përfitime edhe për shëndetin mendor. Dushi në errësirë mund të ulë nivelin e kortizolit – hormonit të stresit – dhe të shndërrohet në një moment ndërgjegjësimi (mindfulness). Në mungesë të dritës, përqendroheni më shumë tek ndjesitë fizike si uji i ngrohtë, aroma e produkteve dhe zhurma e ujit, gjë që mund të funksionojë si një formë meditimi.

Nuk është zgjidhje magjike

Megjithatë, specialistët paralajmërojnë se kjo nuk është një kurë për pagjumësinë kronike apo çrregullimet serioze të gjumit. Në raste të tilla, rekomandohet konsultim me mjekun. Po ashtu, nëse kjo praktikë shihet si detyrim, mund të shkaktojë stres shtesë dhe të ketë efekt të kundërt.

Çfarë funksionon vërtet për gjumë më të mirë?

Për një gjumë cilësor, ekspertët rekomandojnë:

• Të mbani orar të rregullt gjumi.
• Të shmangni kafeinën të paktën 6 orë para gjumit.
• Të mos konsumoni vakte të rënda rreth 3 orë para gjumit.
• Të kufizoni dritat e forta dhe ekranet në mbrëmje.
• Ta mbani dhomën e gjumit të errët, të freskët dhe të qetë.
• Nëse nuk ju zë gjumi brenda 20 minutash, të ngriheni për pak minuta dhe të bëni diçka relaksuese, pastaj të provoni sërish.

Flaka

279

SONDAZHI

Intervenimi ushtarak i SHBA-ve dhe Izraelit në Iran është në favor të popullatës iraniane, apo jo?

Po, populli po çlirohet nga dikatatura

Jo, populli iranian po persekutohet

• 
• 
• 
• 
• 
• 
•