Britania planifikon ndalimin e mediave sociale për fëmijët nën 16 vjeç
Botuar nga Drin Zenku
Britania po shqyrton një ndalim të shpejtë të përdorimit të mediave sociale për personat nën moshën 16 vjeç, duke përfshirë edhe kufizime për chatbot-et e inteligjencës artificiale.
Muajin e kaluar, kryeministri britanik Keir Starmer nisi një konsultim publik për ndalimin e mediave sociale për fëmijët nën 16 vjeç. Qeveria tani po punon për ndryshime ligjore që do të mundësonin hyrjen në fuqi të masave menjëherë pas përfundimit të fazës së konsultimit.
Sipas raportimeve, ndalimi pritet të bazohet në modelin e aplikuar nga Australia, e cila u bë vendi i parë në botë që bllokoi aksesin në rrjetet sociale për personat nën 16 vjeç. Masa synon të mbyllë boshllëqet ligjore që kanë lënë jashtë rregullave të sigurisë disa platforma dhe chatbot-e të inteligjencës artificiale.
Autoritetet britanike theksojnë se iniciativa është pjesë e përpjekjeve për t’iu përgjigjur më shpejt rreziqeve digjitale që prekin të miturit, përfshirë varësinë nga rrjetet sociale, ekspozimin ndaj përmbajtjeve të dëmshme dhe ndërveprimet e pasigurta online.
Ndërkohë, edhe Spanja, Greqia dhe Slovenia kanë bërë të ditur se po shqyrtojnë masa të ngjashme, duke sinjalizuar një trend në rritje në Evropë për rregullimin më të fortë të hapësirës digjitale për të miturit.
Flaka
Botuar nga Drin Zenku
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
