Valë kërcënimesh trondit Tetovën – Fëmijët mes frikës dhe ndërprerjes së mësimit!

Mëngjesin e sotëm janë regjistruar sërish alarme të rreme për bomba në disa shkolla të Tetovës, duke rikthyer frikën, panikun dhe ndërprerjen e procesit mësimor për qindra nxënës.

Sipas informacioneve zyrtare, njoftimet për vendosje të mjeteve shpërthyese janë pranuar në orët e para të mëngjesit, ndërsa menjëherë në terren kanë dalë njësitet policore. Pas kontrolleve të detajuara është konstatuar se bëhej fjalë për alarme të rreme, ngjashëm me rastet e mëparshme.

Megjithatë, pavarësisht se nuk është gjetur asnjë mjet i rrezikshëm, pasojat psikologjike dhe arsimore mbeten reale. Nxënësit janë evakuuar, mësimi është ndërprerë dhe prindërit janë përballur me ankth e pasiguri.

Drejtoresha e shkollës fillore “Kirili dhe Metodi”, Sihana Kaba Kasami, reagoi ashpër ndaj autorëve të këtyre veprimeve, duke theksuar se krijimi i stresit tek fëmijët është i papranueshëm, veçanërisht në një periudhë që ajo e cilësoi si muaj reflektimi dhe faljeje.

Edhe këshilltari komunal nga AKI, Berat Murati, vlerësoi se shkollat duhet të jenë hapësira sigurie dhe qetësie, jo vende paniku. Ai kërkoi masa konkrete për rritjen e sigurisë dhe organizimin e orëve plotësuese për të kompensuar mësimin e humbur.

Aktivisti Arianit Xhaferi theksoi se fenomeni po përsëritet prej gati dy vitesh, duke ngritur shqetësimin për mungesë rezultatesh konkrete nga organet e sigurisë. Sipas tij, evakuimet e shpeshta po ndikojnë në stabilitetin emocional dhe në ritmin e mësimit të nxënësve.

Nga Komuna e Tetovës është paralajmëruar konferencë për shtyp në ora 12:30 për këtë çështje, ndërsa nga Sektori për Arsim deri në publikimin e këtij lajmi nuk ka pasur përgjigje lidhur me zëvendësimin e orëve të humbura.

Sipas Ministria e Punëve të Brendshme e Maqedonisë së Veriuts, hetimet janë jashtëzakonisht komplekse dhe përfshijnë shkëmbim ndërkombëtar informacioni, duke pasur parasysh se në shumë raste kërcënimet dërgohen përmes email-eve anonime dhe rrjeteve të maskuara.

Vetëm gjatë vitit 2025 janë regjistruar mbi 300 kërcënime me bomba në shkollat e Maqedonia e Veriuts. Që nga viti 2022, valë të tilla alarmesh janë përsëritur periodikisht, por në shumicën dërrmuese të rasteve kanë rezultuar të rreme.

Fenomeni nuk është i izoluar vetëm në vend, pasi kërcënime të ngjashme janë raportuar edhe në disa shtete të rajonit, duke hapur dilema nëse bëhet fjalë për huliganizëm individual, kopjim të rasteve të mëparshme apo për testim të qëllimshëm të sistemit të sigurisë dhe reagimit institucional.

Ndërkohë, pas çdo alarmi të rremë, mbetet e njëjta pasojë konkrete: mësim i ndërprerë, fëmijë të shqetësuar dhe institucione të angazhuara në situata që, fatmirësisht, deri më tani kanë përfunduar pa rrezik real. Gazeta Flaka

274

SONDAZHI

Intervenimi ushtarak i SHBA-ve dhe Izraelit në Iran është në favor të popullatës iraniane, apo jo?

Po, populli po çlirohet nga dikatatura

Jo, populli iranian po persekutohet

• 
• 
• 
• 
• 
• 
•