Administrata Publike, Zaev: Bëjmë analiza për uljen e numrit. VMRO-DPMNE: Thonë zvogëlim, punësuan 20 000 ushtarë partiakë

Qeveria planifikon zvogëlimin e administratës publike pas zgjedhjeve presidenciale.

Kryeministri Zaev mbrëmë në TV21 tha se kjo është pjesë e reformave të planifikuara. Por, kreu i ekzekutivit nuk ishte në gjendje të thotë se sa do të jetë numri i administratorëve që do të largohen. Për këtë pjesë qeveria ende po analizon.

“Qëllimi ynë është të zvogëlojmë administratën publike por jo përmes largimit të njerëzve nga puna. Po bëhen analiza, kjo është pjesë e reformave. Duam ta zvogëlojmë, por përmes ofertave të ndryshme duam t’u ofrojmë alternativë të punësuarve në administratë”,- tha kryeministri, Zoran Zaev.

Nga VMRO akuzojnë se administrata ka 150 mijë të punësuar prej të cilëve 20 mijë punësime partiake. Deklaratën e kryeministrit se pas zgjedhjeve do të fillojë edhe zvogëloi i administratës nga VMRO e cilësuan si largim i njerëzve nga puna për të hapur vende për të tjerë ushtarë partiakë.

“Nëse vërtetë në administratën publike ka mbipunësime, përse u bënë atëherë 20 mijë punësime të reja. Përse nuk po ndodh ritransferimi i të punësuarve nga një institucion në tjetrin. Kjo qeveri, me 28 ministrat e saj, me qindra drejtorë bashkë me zëvendësit e tyre, siç e bënë me ligj, harxhuan 9 miliardë euro të qytetarëve të Maqedonisë, a asnjë gozhdë nuk kanë ngulur askund”,- tha Vllatko Gjorçev nga VMRO-DPMNE.

Administrata publike në Maqedoninë e Veriut llogaritet si më e mbingarkuara nga vendet e rajonit. Këtu bëjnë ende pjesë edhe të punësuarit në bazë të Marrëveshjes së Ohrit, që vazhdojnë të marrin pagë por të mos paraqiten në vendet e punës. Nuk ka një shifër zyrtare se sa prej tyre janë sistemuar nëpër institucione.