Ahmeti-Lawson: Aleanca evropiane e partive progresive është e ardhmja

Redaksia
Publikuar nga Redaksia 24 Janar, 2023 19:52

Ahmeti-Lawson: Aleanca evropiane e partive progresive është e ardhmja

Kryetari i Bashkimit Demokratik për Integrim , Ali Ahmeti ka pritur sot në takim ambasadorin e Britanisë së Madhe në vend, Matthew Lawson.

Ahmeti dhe Lawson bashkëbiseduan mbi momentumin politik, rëndësinë e stabilitetit politik, aleancën europiane të forcave progresive, unitetin veprues për miratimin pa prolongim të stërzgjatur të ndryshimeve kushtetuese dhe fokusimin e plotë të vendit në realizimin e reformave për të përshpejtuar procesin e integrimit në Bashkimin Evropian.

Ahmeti shprehu falënderim ndaj përkrahjes që shteti britanik i ka dhënë gjithmonë proceseve të zhvillimit demokratik dhe ekonomik të vendit, anëtarësimit në NATO dhe integrimit në Bashkimin Evropian, si dhe për përkrahjen konstruktive në tejkalimin e kontesteve në frymën e fqinjësisë së mirë dhe avancimit të rrugës evropiane.

Ahmeti njoftoi ambasadorin Lawson mbi takimet informative që po realizon Bashkimi Demokratik për Integrim me qytetarët nën moton “Bashkë për në Evropë” për të përcjellur mesazhin e qartë të bashkimit të forcave në misionin e integrimit.

Aleanca europiane e partive progresive është e ardhmja, ka potencuar mes tjerash Ahmeti.

Ambasadori Lawson ka përsëritur përkrahjen britanike për integrimin evropian të Maqedonisë së Veriut, si dhe reformat në vend, por edhe interesimin e madh për të rritur investimet britanike në vendin tonë.

Redaksia
Publikuar nga Redaksia 24 Janar, 2023 19:52