Apeli vërteton vendimin e Penales: Zaev Është i pafajshëm në rastin “Mitmarrja”

Gjykata e Apelit hodhi sot poshtë ankesën e Prokurorisë Themelore për Ndjekje të Krimit të Organizuar dhe Korrupsionit për rastin “Mitmarrja”, në të cilin i akuzuar ishte kryeministri, Zoran Zaev, duke lënë si vendim të plotfuqishëm vendimin lirues të Gjykatës Penale.

Apeli në vendimin e marrë në një seancë jopublike, e hodhi poshtë si të paarsyetuar ankesën e PNKOK-ut dhe la në fuqi vendimin e Gjykatës Penale të datës 25 maj 2018. Vendimi i tillë do të publikohet në tërësi edhe në ueb faqen zyrtare të Gjykatës së Apelit, sipas afateve ligjore kohore të përcaktuara në Ligjin për menaxhim dhe ndjekje të lëndëve nëpër gjykata.

Kryeministri Zaev në lëndën “Mitmarrja” akuzohej se në kohën kur ishte kryetar i komunës së Strumicës, ka kërkuar mito prej 160 mijë eurosh nga biznesmeni, Ivan Nikollov – Sacevaliev, për shitjen e një toke ndërtimore në pronësi të shtetit me vetëm 2 euro metri katror, për të cilën biznesmeni ka qenë i interesuar ta privatizojë. Zaev fitoi gjykimin për rastin të cilin e ka cilësuar në vazhdimësi si politikisht të montuar me qëllim që të pengohej që të mos publikonte të ashtuquajturat “bomba” të opozitës së atëhershme.