Australia, drejt zgjedhjeve të parakohshme me fushatën më të gjatë në histori

Australia, drejt zgjedhjeve të parakohshme me fushatën më të gjatë në histori

Australianët do t’u drejtohen kutive të votimit në datën 2 korrik, pas fushatës më të gjatë elektorale në historinë e vendit. Kryeministri Malcolm Turnbull shpalli zgjedhjet e përgjithshme disa muaj më herët, pasi Dhoma e Lartë e Parlamentit bllokoi disa herë rresht legjislacionet e qeverisë.

Të dielën, kryeministri i kërkoi guvernatorit të përgjithshëm, Sir Peter Cosgrove, që të shpërbëjë të dyja dhomat e Parlamentit. Sipas medieve, fushata do të dominohet nga ekonomia, arsimi dhe shëndetësia.

“Guvernatori i përgjithshëm pranoi këshillën time për të shpërbërë të dyja dhomat e Parlamentit dhe të shpallë zgjedhjet e parakoshme që do të mbahen më 2 korrik, në atë që njihet si shpërbërje e dyfishtë”, deklaroi kryeministri Turnbull.

Sipas sistemit politik australian, guvernatori i përgjithshëm është përfaqësuesi i kreut të shtetit, Mbretëreshës Elizabeth II-të. Shpërbërja e dyfishtë lejohet nga Kushtetuta australiane, kur Senati rrëzon dy herë rresht ligjet që janë miratuar nga Dhoma e ulët, apo ajo e Përfaqësuesve.

Kjo mundësi kushtetuese shfrytëzohet shpesh politikisht nga qeveritë, të cilat shohin avantazh te zgjedhjet e përgjithshme, pasi nëse kthehen në pushtet me votëbesimin e popullit do ta kenë më të lehtë që të miratojnë ligjet. Në zgjedhje do të votohet për 150 vendet e Dhomës së Ulët dhe për 76 vendet në Senat, hera e parë kjo që prej vitit 1987. Fushata ka nisur që tani, megjithëse thuasje dy muaj para zgjedhjeve, duke shënuar fushatën më të gjatë në historinë e vendit.

Redaksia Flaka
nga Redaksia Flaka Maj 8, 2016 11:45

REKLAMA