Është shumë herët të flitet për çmimin e energjisë elektrike, sepse fillimisht duhet sqaruar se kush dhe sa mund të prodhojë rrymë në vend, në mënyrë që presioni të mos jetë vazhdimisht mbi EEM, konsideron kryetari i Komisionit rregullativ për energji dhe shërbime të ujit (KRRE), Marko Bislimovski.
“EEM duhet të ketë çmim me të cilin do t’i mbulojë shpenzimet e saj dhe në bazë të tij të planifikojë prodhimin e saj, ndërsa “EVN houm” furnizimin. Nëse shpenzimet për kompanitë për furnizimin e energjisë elektrike janë shumë të larta, atëherë KRE do të shqyrtojë mundësinë e zvogëlimit ose heqjes së plotë të fitimeve të kompanive energjetike që i rregullon, me qëllim që të shmangen tronditjet e çmimeve”, tha Bislimovski i ftuar në emisionin “Top tema” në TV Telma.
Ai theksoi se metodologjia për llogaritjen e çmimeve të KRE-së, e cila është e njëjtë si në BE, garanton fitime, ndërsa nëse kompanitë energjetike nuk i përcjellin vendimet e Komisionit, janë vetë përgjegjëse për humbjet.
“Ky është problemi i tyre. Vetë metodologjia parasheh dhënien e fitimit, ai fitim për vitin 2022 mund të hiqet tërësisht ose pjesërisht, për të mos shkaktuar tronditje të çmimeve tek konsumatorët”, shtoi Bislimovski.
Sipas tij, secili furnizues ka strategjinë e tij – disa sigurojnë energji elektrike paraprakisht, disa rrezikojnë dhe presin më vonë me shpresën se çmimi do të jetë më i favorshëm – dhe rregullatori nuk mund të ndërhyjë në vendimin e tyre të biznesit.
“Nga aspekti i sigurisë së furnizimit të energjisë elektrike, asnjë nga konsumatorët nuk ka mbetur pa rrymë, të gjithë janë ndërmarrë nga ana e furnizuesit në moment të fundit”, tha Bislimovski.
