Duke komentuar deklaratat e liderit të VMRO-DPMNE-së për faktin se partnerët në qeveri po merren vesh për ridefinimin e shtetit, shefi i diplomacisë në “360 gradë” thotë se vetëm politikanët që nuk kanë ide për një jeta më e mirë për qytetarët po i kthehet retorikës së viteve nëntëdhjetë, përcjell FLAKA.
Deklaratat e liderit të VMRO-DPMNE-së, Hristijan Mickoski, se partnerët në qeveri po negociojnë për krijimin e një shteti binacional, janë zhgënjyese dhe tragjike, ka komentuar ministri i Jashtëm dhe zëdhënës i BDI-së, Bujar Osmani, në një intervistë për “360 gradë” në TV Alsat.
“Të mobilizosh gjithë energjinë e urrejtjes ndaj bashkëqytetarëve, ndaj shqiptarëve, ndaj komuniteteve të tjera dhe të gjitha këto t’i vësh në shërbim të karrierës tënde politike dhe partisë tënde është gjëja më e papërgjegjshme që një politikan mund të bëjë ndaj këtij vendi. Mobilizon energjinë e intolerancës, të frikës dhe urrejtjes ndaj të tjerëve, krijon teori konspirative, sepse ndoshta këtë e këshillojnë të bëjë”, tha Osmnai.
360°: A ka biseda të tilla apo jo?
Osmani: Absolutisht jo.
Shefi i diplomacisë beson se përveç krijimit të një modeli funksional multietnik, Maqedonia e Veriut luajti një rol të rëndësishëm në rajon dhe në skenën ndërkombëtare si kontribuese për paqen.
“Të gjithë e pranojnë dhe vlerësojnë se, vetëm politikanët që qartazi nuk kanë ide për t’u ofruar qytetarëve një jetë më të mirë, i kthehen retorikës së viteve nëntëdhjetë. E di që lejohet kur afrohen zgjedhjet, këtu pas një viti, por pas Marrëveshjes Kornizë u vendosën disa vija të kuqe që as politikanët më ekstremë nuk i sfiduan, sepse e dinin që nuk lejohej të shkohej atje. Natyrisht që ky politikan nuk e ka kuptimin e atyre kufijve që krijojnë një funksionim normal, multietnik të këtij shteti”, tha Osmani.
Mickoski këto ditë bën deklarata në të cilat thotë se “nuk janë vetëm ndryshimet kushtetuese për të përmbushur diktatin bullgar për të cilin po punon qeveria”, por se një nga idetë për të cilat po punohet është krijimi i një shteti binacional të dy popujve, disa bashkësive që përmenden në Kushtetutë dhe ekzistenca e pakicave.
“Pas amendamenteve të mundshme kushtetuese, do të mbetet të vihet kufiri dhe t’i jepet fund ekzistencës së Maqedonisë”, ka deklaruar Mickoski.
Nga ana tjetër, informacionet që vijnë nga grupi i punës për përgatitjen e ndryshimeve kushtetuese janë se tema e zëvendësimit të përcaktimit kushtetues prej 20 për qind me gjuhën shqipe nuk do të jetë në agjendën e tij.
Osmani thotë se edhe në komunitetin shqiptar ka një konflikt mes dy koncepteve, veçanërisht ndërmjet mjedisit politik – konceptit të atyre që ende shihen si përfaqësues të një komuniteti të vogël që vazhdimisht kërkon disa të drejta nga komuniteti më i madh dhe koncepti i atyre të cilët besojnë se po ndërtojnë së bashku një shtet të përbashkët.
“Çështja e 20 për qind është interes i përbashkët i të gjithëve. Po të mos ishte 20 për qind, nuk do të kishim vënë re që regjistrimi ishte një lloj operacioni, do të ishte statistikor, askush nuk do të ishte ngacmuar se si janë numëruar, a janë përfshirë të gjithë. Pra, do të jetë në interesin e të gjithëve që të tejkalohet ky politizim i procesit të regjistrimit. Qëndrimi im është – nëse arrijmë të gjejmë një konsensus, do të ishte mirë dhe në interesin e të gjithëve që të riemërtojmë 20 për qind. Nëse nuk mundemi, nuk do të dëshiroja që të jemi alibi për Mickoskin dhe kompaninë për të penguar të ardhmen evropiane të vendit”, thotë Osmani.
Ai shton se shqiptarët asnjëherë nuk kanë qenë arsyeja e ngecjes së vendit në rrugën euroatlantike dhe se nuk do të ishin në këtë pikë kritike kur vendi është në udhëkryq. FLAKA
