Imunizimi, vaksinat e mbërritura të dielën shpërndahen në të gjithë vendin
Nesër pritet të fillojë vaksinimi i 20 mijë personave mbi 77 vjeç me vaksinën Astra Zeneca. Nga ora 8 e mëngjesit poliklinika Jane Sandanski, ajo në Çair dhe poliklinika Bukuresht në Shkup do t’i hapin dyert për vaksinimin e të moshuarve. Në të njëjtën kohë vaksinimi do të nisë edhe në shtëpitë e shëndetit në Prilep, Ohër, Gostivar, Shtip, Kumanovë, Veles, Strumicë, Kavadar dhe Manastir, ndërsa në qytetet tjera iminuizimi do të fillojë të premten.
Ministria e Shëndetësisë
“Deri tani janë caktuar 5976 termine për vaksinimin e qytetarëve mbi 77 vjeç. Pikat e vaksinimit do të punojnë në dy ndërrime. Do të hapen në orën 8 të mëngjesit deri në orën 20. Mjeku amë i secilit qytetar do të caktojë termin për vaksinim dhe është i detyruar të tregojë orën dhe në cilën pikë do të vaksinohet pacienti”
Ndërkohë vaksinimi masiv i popullsisë ku nuk përfshihen të moshuarit, do të zhvillohet në sallën e madhe sportive Boris Trajkovski. Drejtori i Qendrës Sportive thotë se salla është në dispozicion për vaksinim dy muajt e ardhshëm.
Deri javën e kaluar ne kishim disa ndeshje këtu, por tani gjithçka është vënë në funksion të përgatitjes së terrenit për të qenë punkt vaksinal për 2,5 muajt e ardhshëm, e më pas do të kthehet në normalitet. Do të thotë do kemi një verë ndryshe këtë vit, por normalisht kjo është prioritet dhe mendoj se do ketë sukses të madh mbi vaksinimin. Përveç sallës madhe gjithçka tjetër në qendrën sportive funksionon njëjtë si më parë- deklaroi Aleksandar Petrovski, Drejtor i “Boris Trajkovski” Shkup.
Procesin e vaksinimit do ta kryejnë mjekë dhe infermierë të Shtëpisë së Shëndetit në Shkup të cilët do të ndahen në bazë të nevojës dhe planit për vaksinim. Ndërkohë të Hënën fillon vaksinimi i policëve të cilët janë më të ekspozuar ndaj rreziqeve, pjesëtarë të armatës, gazetarët, të punësuarit nëpër Prokurori dhe Gjykata, shoferët e autobusëve të ndërmarrjes publike, zjarrfikësit, të punësuarit nëpër pikat pagesore rrugore si dhe edukatoret e çerdheve./Alsat
