Irani arreston liderin e një grupi opozitar

Irani arreston liderin e një grupi opozitar

Autoritetet në Iran thanë se kanë arrestuar liderin e një grupi opozitar, me bazë në SHBA, nën dyshimet se ka qenë i përfshirë në një sulm ndaj një xhamie më 2008 në Shiraz, ku u vranë 14 persona dhe u plagosën mbi 200 të tjerë.

Ministria e Inteligjencës tha sot se ka arrestuar Jamshid Sharmahd, lider i grupit me bazë në Kaliforni të quajtur Asambleja e Mbretërisë së Iranit.

Sharmahd akuzohet nga Irani se udhëheqë krahun ushtarak të këtij grupi, të quajtur Tondar.

Zyrtarët thanë se grupi dyshohet se ka planifikuar edhe sulme të tjera, por nuk dhanë më shumë detaje.

Televizoni shtetëror iranian nuk ka specifikuar se ku dhe kur Sharmahd është arrestuar.

Asambleja e Mbretërisë së Iranit është një grup monarkist, që synon rrëzimin e qeverisë islamiste të Iranit.

Redaksia Flaka
nga Redaksia Flaka 1 Gusht, 2020 20:23

© FLAKA.COM.MK - Derisa keni vendosur të merrni përmbajtje nga kjo faqe, në tërësi pajtoheni me kushtet e përdorimit.