Koalicionet parazgjedhore, Thaçi: Jo koalicion me LSDM-në, PDSh vetë në zgjedhje

Desk
By Desk March 6, 2020 19:31

Koalicionet parazgjedhore, Thaçi: Jo koalicion me LSDM-në, PDSh vetë në zgjedhje

Kreu i PDSh-së, Menduh Thaçi, nuk e sheh si opsion të hyjë në derën e koalicionit parazgjedhor, që ia la hapur kreu i LSDM-së. I ftuar në “Presing” në Kosovë, Thaçi tha se nuk ka kohë që koalicioni i LSDM-së me një parti të vogël shqiptare, të zgjerohet edhe me partinë që drejton. Në zgjedhje PDSh do të garojë e vetme. Thaçi thotë se ka shumë dallim mes tij dhe Bilall Kasamit e se kurrë nuk do bënte koalicion me Zaevin apo këdo qoftë, pa treguar qartë se për çfarë janë dakorduar.

“Vet do shkoj. Ka shumë pak kohë se ne këto 4-5 ditë duhet të mbyllim listat. Unë nuk jam i gatshëm të bëj kompromis me çështjen e pozitës së zëvendëskryeministrit. Deri tani qeveria ka pasur 4 zëvendëskryeministra. Kërkesa ime është ndryshe, një zëvendëskryeministër dhe të mbulojë sektorin ekonomik dhe financiar.”,- tha kryetari i PDSh-së, Menduh Thaçi.

Thaçi: S’guxon të ketë qeveri pa fituesin te shqiptarët

Thaçi nuk hedh poshtë mundësinë e koalicioneve paszgjedhore, por përkujton se atëherë flet matematika e jo kalkulimet e liderëve. Nëse dallimet mes dy partive maqedonase pas 12 prillit janë të vogla, pranon mund të përsëritet skenari i 2016. Por, nëse VMRO fiton me dallim të madh votash, ripërsëritja e 2016 do ishte një skenar me rrezik edhe për shqiptarët.

“Ne atëherë legalizojmë mënyrën se qeveri mund të bëjë kush mbërrin. E mundet që në zgjedhjet e katërta një parti maqedonase të marrë 65 deputetë, e të thotë nuk më duhen forcat politike shqiptare.”,- u shpreh kryetari i PDSH-së, Menduh Thaçi.

Votat shqiptare për LSDM-në, Thaçi: Nuk përsëriten, shqiptarët janë zhgënjyer

Thaçi gjithsesi nuk beson as se LSDM do të përsërisë rezultatin e zgjedhjeve të 2016, kur mori votat shqiptare. Ai thotë se shqiptarët e kuptuan që as me LSDM-në gjërat nuk ndryshuan për ta.

“Në aspektin ekonomik, shqiptarëve iu përkeqësua situata. Vetëm një çështje ka pozitive, që ne debllokuam procesin integrues. Çështjet e tjera nuk kanë ecur përpara.”,- theksoi kryetari i PDSh-së, Menduh Thaçi.

Kreu i PDSH-së është i gatshëm të përballet me të gjithë liderët shqiptarë në debat në mënyrë që populli të dijë për kë duhet të përcaktohet më 12 prill.

Desk
By Desk March 6, 2020 19:31