Kryeministri Dimitar Kovaçevski kërkoi nga ministri i Arsimit dhe Shkencës Jeton Shaqiri dhe ekipi këshillues që edhe një herë të shqyrtohen reformat që janë propozuar në këtë dikaster dhe të shihet efekti i atyre të realizuara, përcjell FLAKA.
“Ka një diskutim mjaft të gjerë për reformën në arsim. Kam biseduar me ministrin e Arsimit që të ulemi me ekipin e tij këshillues, me këshillat që kanë në fushën e arsimit, për të rishikuar edhe një herë reformat që u propozuan dhe ato që u zbatuan për të parë efektin e tyre. Aty ku ende nuk kemi filluar të shohim se cili është qëndrimi i mësimdhënësve, prindërve, ekspertëve, që më në fund të marrim një vendim që do të jetë më i favorshëm për të gjitha palët”, tha Kovaçevski sonte për Tv Sitel.
Ai foli për vonesën e teksteve dhe tha se arsyeja është se është dashur të bëhen dhe të shkruhen porosi për shkak të ndryshimit të koncepteve arsimore në arsimin fillor.
Kovaçevski tha se arsimi duhet të përmirësohet dhe nxënësit duhet të fitojnë njohuri që do të jenë menjëherë të zbatueshme.
Arsimin dual tashmë e ndjekin disa mijëra nxënës dhe me këtë, sipas tij, arrijmë të sigurojmë fuqi punëtore për fabrikat që po hapen në vend në rritje në numër. Në një kohë të shkurtër, siç tha ai, do të kemi investimin e “Gersheimer” për prodhimin e produkteve shumë të sofistikuara në industrinë mjekësore, të baterive litium të “BMZ Group” nga Gjermania, të “Yageo” për prodhimin e çipsave, e cila do të ketë nevojë për fuqi punëtore që do të prodhojë ato produkte të sofistikuara. Arsimi duhet të vazhdojë me këtë formë, tha Kovaçevski. FLAKA
