Ligji për Nënshtetësi, Zaev: Brenda javës të kemi zgjidhje. ASh – Alternativa të tërheq amendamentet

Kryeministri, Zoran Zaev, paralajmëron takim brenda javës me opozitën shqiptare Aleanca –Alternativa për gjetjen e zgjidhjes afatgjate për propozim ligjin e nënshtetësisë, me qëllim të zhbllokimit të pakos së pestë të masave ekonomike.

Kryeministri thotë se paraprakisht do të konsultojë ministrat e kabinetit të tij qeveritar në marrjen e qëndrimit përfundimtar.

“Këtë javë do të mbajmë takim. Nesër mbrëma kam takim përfundimtar me Ministrinë e Punëve të Brendshme, të Drejtësisë dhe institucione të tjera përkatëse, që të konstatojmë atë që ishte obligim i yni nga takimi i parë, për pranimin e sugjerimeve nga dy partitë opozitare, Aleanca dhe Alternativa. Më pas, të mërkurën, të enjten apo të premten, ta caktojmë takimin, ku normalisht pres të gjejmë zgjidhje afatgjate për marrjen e shtetësisë.”,- tha kryeministri, Zoran Zaev.

Kryeministri njëherit apeloi te opozita shqiptare që të tërheq amendamentet të cilat bllokojnë jetësimin e pakos së pestë ekonomike.

“Apeloj që tani të zhbllokojnë pakon e pestë, janë të vetëdijshëm për qasjen tonë në proces dhe pranimin e sugjerimeve, argumentet që u dhanë në tavolinë gjithsesi se janë të pranueshme, ata duhet të kuptojnë edhe argumentet e qeverisë. Me të vërtetë apeloj që të tërheqin amendamentet që të zhbllokohen të gjitha ligjet nga pakoja e masave për luftë kundër Kovid-19.”,- theksoi kryeministri, Zoran Zaev.

Javën e shkuar kryeministri Zaev takoi në kuvend deputetë të grupit parlamentar të opozitës shqiptare. Takimi u përmbyll me optimizmin e gjetjes së zgjidhjes në dy pista: në njërin grup do të jenë personat që kanë lindur në Maqedoninë e Veriut dhe në grupin tjetër personat që kërkojnë të fitojnë shtetësisë në bazë të lidhjes së martesës apo arsye të tjera./Tvm2