Lluka: Termocentrali “Kosova e Re”, projekt jetik për vendin

Lluka: Termocentrali “Kosova e Re”, projekt jetik për vendin

Termocentrali “Kosova e Re”, mund të dështojë të ndërtohet në rast se vijnë në pushtet kundërshtarët e këtij projekti, ka thënë ministri në detyrë i Zhvillimit Ekonomik Valdrin Lluka. Ai ka bërë të ditur se  me tërheqjen e qeverisë nga kontrata, buxheti i vendit do t’i humb afro 20 milionë euro. Në anën tjetër shoqëria civile po e konsideron këtë projekt si të dëmshëm për vendin.

Nëse qeveria e ardhshme që pritet të formohet pas zgjedhjeve të 6 tetorit, do të jetë kundërshtare e projektit të Termocentralit, me tërheqjen eventuale nga kontrata me Kontour Global, rrezikohet dëmtimi i buxhetit të vendit. Kështu ka thënë në një prononcim për Radio Kosovën, ministri në detyrë i Zhvillimit Ekonomik Valdrin Lluka.

“Normalisht ata që kundërshtojnë këtë projekt mund ta tërheqin nëse vijnë në pushtet .Mirëpo kjo e ka një kosto financiare, 19,7 milion është çmimi i kostos që i kushton buxhetit të vendit në rast se tërhiqet me gabim të Parlamentit të Kosovës, çdo gjë tjetër me gabime të kompanisë Countur Global, ne atëherë përfitojmë”,  tha Lluka.

Ministri në detyrë Lluka bëri të ditur se ndërtimi i Termocentralit të ri nuk do të filloj me kohë për shkak të disa mbylljeve financiare e që sipas tij përgjegjëse për këtë është kompania amerikane “Contour Global”. Por Lluka tha se ky nuk është afati i fundit, pasi që janë edhe 8 muaj në dispozicion për të mos mbetur fajtore asnjëra palë.

“Kosova ka jashtëzakonisht interes për një Termocentral të ri,  ne ofrojmë Termocentrale shumë të vjetërsuara që shkaktojnë ndotje të ambientit, ndërsa Termocentralin e ri  nuk duhet asnjëra qeveri ta dështojë sepse është projekt jetik për vendin”, shtoi Ministri Lluka.

Grupi i organizatave të shoqërisë civile (Balkan Green Foundation, Instituti GAP, Grupi për studime Juridike dhe Politike si dhe Instituti për Politika Zhvillimore),  kanë kundërshtuar në vazhdimësi këtë kontratë. Instituti GAP, i ka thënë Radio Kosovës, se kontrata do ta falimentojë Kosovën ekonomikisht, do të pamundësojë liberalizimin dhe integrimin e tregut të energjisë elektrike, si dhe paraqet një goditje për mjedisin, shëndetin dhe të drejtat e njeriut. Mes tjerash shoqëria civile konsideron se ndërtimi i këtij termocentrali  e shtrenjton energjinë elektrike për mbi 90%.

Por një gjë të tillë, e mohon ministri në detyrë, Valdrin Lluka, i cili tha se rritja e çmimit është vetëm spekulim. Lluka tha se kundërshtarët e projektit duhet ta kenë parasysh se Kosova nuk ka rezerva tjera përveç thëngjillit për të siguruar energji elektrike.

Ndryshe, qeveria e Kosovës në fund të vitit 2017 ka nënshkruar marrëveshjen komerciale me kompaninë amerikane “Contour Global”, për ndërtimin e këtij termocentrali me kapacitet 500 megavat, i cili parashihet të kushtojë 1.3 miliard euro.

Redaksia Flaka
nga Redaksia Flaka Shtator 7, 2019 20:01

HAPËSIRË E SPONSORIZUAR
Loading...

© FLAKA.COM.MK - Derisa keni vendosur të merrni përmbajtje nga kjo faqe, në tërësi pajtoheni me kushtet e përdorimit.

REKLAMA