Maksuti: Regjistrimi mund të shtyhet me një amendament
Ligji për Regjistrimin e Popullsisë mund të ndryshohet me një ndërhyrje me amendament të veçantë, pasi bëhet fjalë vetëm për shtyrje të afatit të regjistrimit, thotë profesori universitar, Mersim Maksuti. Ai për TVM2 thotë se ndryshimet në ligj që do të shtyjë regjistrimin nga prilli në shtator nëse dërgohen me flamur evropian dhe me procedurë të shkurtuar, e pamundëson bllokimin me amendamente.
“Vetëm me ligj mund të shtyhet afati. Me ndërhyrje me një amendament të veçantë në Ligjin e regjistrimit të popullsisë mundet Kuvendi ta shtyjë afatin e regjistrimit. Por, duhet të përmendim se shtyrja do të vlejë vetëm për banorët rezident që gjenden në RMV, ndërsa për qytetarët tanë që janë jashtë e drejta e regjistrimit të tyre vazhdon.”,- tha profesori universitar, Mersim Maksuti.
Marrëveshja Zaev-Mickovski, jolegjitime
Maksuti, marrëveshjen për shtyrjen e regjistrimit të popullsisë mes dy liderëve maqedonas, Zaev dhe Mickoski, e vlerëson si jolegjitime, dhe u sugjeron partive shqiptare në pushtet dhe opozitë të ngrenë zërin më fuqishëm në artikulimin e kërkesave kur bëhet fjalë për të drejtat e shqiptarëve.
“Pikërisht marrëveshja midis kryetarëve të LSDM-së dhe VMRO-së nuk është legjitime, sepse nuk dha mbështetjen e të dy partive shqiptare në Kuvendin e RMV-së dhe kjo nuk mund të pranohet si legjitime. E mira do të ishte meqë ligji duhet të ndryshohet dhe ky ligj ka të bëjë edhe me çështjen që prek edhe badenterin se diskutohet me ligj që tangon edhe komunitetet tjera në radhë të parë komunitetin shqiptarë si komuniteti i dytë më i madh në vend, prandaj pa përfaqësuesit e tyre legjitim në Kuvend kjo marrëveshje duket e cenuar.”,- theksoi profesori universitar, Mersim Maksuti.
Situatën e krijuar lidhur me regjistrimin e popullsisë, Maksuti e sheh si lojë politike nga ana e aktorëve politikë./Tvm2
