Mbi 183 mijë mërgimtarë të regjistruar, Selami: Mërgata regjistrohet, nuk evidentohet

Regjistrimi i diasporës vazhdon, megjithëse me ritme të ulura.

“Evidenca nga vetë-regjistrimi tregon se 183 mijë 836 qytetarë të RMV-së që jetojnë jashtë vendit, janë vetë-regjistruar në aplikacionin elektronik që nga fillimi i këtij procesi, më 1 mars, deri më sot”, thonë nga ESHS.

Por përdorimi i fjalës evidencë në komunikimin mediatik të ESHS-së ka ngjallur sërisht reagime, sidomos pas deklarimeve të vazhduara të kreut të VMRO-DPMNE-së Hristian Mickovski, se diaspora evidentohet, por nuk regjistrohet. Zëvendësdrejtori i Entit Shtetëror për Statistika, Ilmi Selami, një një postim në “Facebook”, ka sqaruar se teksti i publikuar në ueb-faqen e ESHS-së, nënkupton evidencën ditore të personave të regjistruar në bazë të aplikacionit për vetregjistrim.

“Me qëllim për t’a evituar kontekstin eventual të debatit që është hapur lidhur me atë nëse diaspora regjistrohet apo evidentohet, për t’a mënjanuar edhe shkasin më të vogël që mund të keqpërdoret për qëllime të ndryshme dhe për të mos ushqyer frustracione të disa individëve, politikanëve, grupeve të caktuara të interesit, e ndryshuam tekstin”, shkruan Selami.

Pas marrëveshjes Zaev-Mickoski, regjistrimi i banorëve rezidentë, i cili duhej të niste më 1 prill, u ndërpre dhe pritet të fillojë në shtator. Regjistrimi i diasporës ndërkohë, vazhdon pandërprerë deri në shtator./ Tvm2