Ministria e Shëndetësisë: Kapacitetet e spitaleve janë rritur për 50%

Ministri i Shëndetësisë, Venko Filipçe, në koordinimin e mëngjesit me drejtorët e Covid-qendrave dhe kryetarin e KSI-së, kanë biseduar për situatën epidemiologjike në vend, situatën me të sëmurit si dhe kapacitetet e spitaleve.

“Kapacitetet e spitaleve për pranimin e Covid-pacientëve, për dallim nga nëntori i vitit të kaluar janë rritur për 50%, kurse është rritur edhe nevoja për hospitalizimin e pacientëve që kërkon qasje serioze dhe koordinim, që duhet të menaxhohet me sukses. Qindra krevate po bëhen gati nëse eventualisht paraqitet nevoja për të pranuar pacientët me virusin Korona.”,- thonë nga MSh-ja.

Sipas analizave të epidemiologëve, nuk ka nevojë për vendosjen e masave shtesë restriktive, respektivisht të njëjtat nuk do të jepnin rezultate, për shkak se, siç thonë nga MSH-ja, jemi në fundin e aktivitetit të virusit respirator, respektivisht në javën e 6 deri të 8 të valës së tretë. Në kovid – qendrat në tërë vendin aktualisht po trajtohen gjithsej 1.577 pacientë Kovid.

Ministria e Shëndetësisë: Javën e ardhshme vaksinohen policët e gazetarët

Ndërkohë të mërkurën pritet të fillojë vaksinimi i 20 mijë qytetarëve me vaksinën e AstraZeneca, i të moshuarve ndërsa prioritet do të kenë personat mbi 75 vjeç. Imunizimi do të zhvillohet nëpër 30 pika në qytete të ndryshme të vendit. Përmes mjekëve amë qytetarëve do t’u caktohet orari i vaksinimit. Po ashtu grupi teknik nacional për imunizim kundër Kovid-19 ka sjellë vendim që nga java e ardhshme të filloj edhe vaksinimi i të punësuarve në infrastrukturën kritike shtetërore. Gjithsejtë 4000 vaksina do të ndahen për këtë kategori të qytetarëve. Në këtë kategori përfshihen të punësuarit në MPB, të punësuarit në ARM, gazetarët dhe të punësuarit në media, të punësuarit në prokurori, gjykatë, vozitësit e transporti publik, zjarrfikësit, të punësuarit në çerdhe dhe në pikat pagesore.

“Me këtë vendim, grupi teknik për imunizim konsideron se do të mbrohen ata të punësuar të cilët kanë më së shumti kontakte dhe janë në rrezik të lartë. Të gjithë grupet tjera sipas shkallës së rrezikut do të vaksinohen në fazat e ardhshme dhe bëjmë thirrje për durim dhe mirëkuptim.”,- thonë nga Ministria e Shëndetësisë./Tvm2