Një fëmijë 15-vjeçar i rezultuar pozitiv me Covid-19 është pacienti më i ri në Repartin Infektiv në Spitalin e Manastirit. Gjendja e tij tani për tani është stabile, por nga spitali thonë se kufiri i moshës së pacientëve po ulet në mënyrë shqetësuese. Numri i shtrimeve është dyfishuar në vetëm pak ditë dhe në momentin e trajtimit spitalor numërohen 34 pacientë, të gjithë me pasqyrë klinike më të rëndë, përcjell FLAKA.
Popullata e re është më shpesh me një formë të rëndë të sëmundjes dhe në këtë valë të pandemisë, virusi për vetëm njëzet ditë mori jetën e tre të rinjve – një 22-vjeçar nga Manastiri, pastaj një 17-vjeçar, gjimnazist nga Demir Hisari dhe një vajzë 16 vjeçare nga Tetova. Sipas analizave të Ministrisë së Shëndetësisë, shumica e të infektuarve në periudhën nga 6 gushti deri më 4 nëntor janë të pavaksinuar. Nga afro 49,000 pozitivë gjatë kësaj periudhe, 72 për qind nuk ishin të vaksinuar. 78 për qind e pacientëve të shtruar në spital me Covid-19 janë pa dy doza vaksine. Analiza tregon se shkalla e vdekshmërisë tek të pavaksinuarit është shumë më e lartë.
Gjithsej 7275 raste janë aktive në vend, kryesisht në Shkup, pasuar nga Kumanovë, Manastir, Prilep, Veles. Që nga fillimi i pandemisë, 7,178 njerëz kanë vdekur nga koronavirusi. FLAKA
