Në fund të konferencës së sotme për media ku shpalli masat e reja të qeverisë kundër krizës, kryeministri Dimitar Kovaçevski njoftoi se nesër nga Kabineti i tij në Kuvend do të dërgohet propozimi i Risto Penov për ministër të ri të Vetëqeverisjes Lokale, pasi dorëheqjen nga ai post ia ka dërguar edhe bashkëpartiakit të tij nga PLD – Goran Milevski.
Opinioni e kujton Penovin si një nga kryetarët më të mirë të qytetit të Shkupit, i cili e mbajti këtë post për tetë vjet, përkatësisht dy mandate kryetar komune nga viti 1996 deri në 2004.
Nën drejtimin e tij në kryeqytet, pikërisht në ato vite përfunduan plotësisht projektet më të rëndësishme kapitale, stacioni i autobusëve ndërqytetës, rruga e famshme Vodnjanska, si dhe sheshi i qytetit, ku tullat e vjetra të granitit u zëvendësuan me të reja.
