Opinioni përjashtohet nga lënda “Thesari”, dëgjohet ish inxhinieri i DSK-së

Redaksia 2 vjet ago

Gjykata e përjashtoi opinionin nga gjykimi për furnizimin e pajisjes për ndjekje të komunikimeve për nevojat e Drejtorisë së pestë pranë DSK-së për shkak të dëgjimit të dëshmitarit, i cili në periudhën për të cilën duhet të dëshmojë ka qenë i punësuar si inxhinier i pavarur në DSK.

Rastin e udhëheq gjykatësja Xheneta Begtoviq dhe gjendet në procedurë dëshmuese.

Në fillim të seancës së sotme gjyqësore prokurori publik Artan Ajro, kërkoi për shkak të arsyeve të njëjta si dhe me dy dëshmitarët tjerë, opinioni të përjashtohet, duke i marrë parasysh detyrat e punës të cilat i ka kryer dëshmitari dhe rreziku nga lëshimi i një sekreti zyrtar.

Në lëndën “Thesari” i akuzuari i parë është ish drejtori i DSK-së Sasho Mijalkov, si dhe ish shefi i kabinetit të tij Toni Jakimovski, ish ndihmës-ministri në MPB Nebojsha Stajkoviq dhe ish kryeshefi i Drejtorisë së pestë në MPB Goran Grujevski.

Ata akuzohen për keqpërdorim të pozitës zyrtare dhe autorizime dhe dëmtim të buxhetit në vlerë prej 862.045 euro për furnizim të pajisjes elektro-komunikuese për nevojat e Drejtorisë së pestë pranë DSK-së dhe trajnim për shfrytëzimin e tij nga një firmë e Britanisë së Madhe.