Organizata Botërore e Shëndetësisë: “Kovid-19” – kërcënim më i madh se terrorizmi

Më shumë se 1 000 persona kanë vdekur nga virusi Korona dhe mbi 45 000 janë infektuar.

Virusi tashmë ka një emër të ri “Kovid-19”, një kombinim i fjalëve angleze për “korona”, “virus” dhe “sëmundje”.

97 persona kanë vdekur në 24 orët e kaluara. Autoritetet shëndetësore në Kinë kanë regjistruar 2,015 raste të reja. OBSh ka paralajmëruar se sëmundja mund të jetë një kërcënim më i madh se terrorizmi. Për këtë çështje po debatohet edhe në samitin dyditor në Gjenevë.

“Virusi mund të ketë pasoja më serioze se çdo akt terrorist. Kjo është e vërteta. Nëse bota nuk dëshiron të zgjohet dhe ta shohë këtë virus si armik numër një, atëherë ne nuk i kemi mësuar mësimet. Ne duhet të investojmë në kujdesin shëndetësor, në përgatitjet.”,- tha drejtori gjeneral i OBSh-së, Tedros Adanom Gebrejesus.

Virusi Korona është regjistruar në 27 vende. Jashtë Kinës ka dy raste fatale. Shqetësues edhe fati i mijëra njerëzve që kanë ngecur në dy anije me të infektuar. Njëra është në karantinë në Japoni dhe tjetra nuk ka marrë leje të hynte në Tajlandë dhe tre vende të tjera, edhe pse tek udhëtarët nuk u vërtetua prania e “Kovid -19”.

“Kjo është java e dytë dhe duket si një jetë e tërë. Ne duam të udhëtojmë me anije. Por, këtë herë ne ishim në vendin e gabuar dhe në kohën e gabuar.”,- theksoi udhëtari në “Diamond Princes”, Seli Abel.

Në Kinë janë shkarkuar ndërkohë disa zyrtarë të lartë për shkak të vendimeve të pasuksesshme rreth kontrollit të zgjerimit të sëmundjes. Vaksina pritet të jetë gati për përdorim pas 18 muajsh