Osmani në Finlandë: Të përkushtuar në rrugën drejt NATO-s dhe BE-së

Redaksia 2 vjet ago

Zëvendëskryeministri për Çështje Evropiane, Bujar Osmani po qëndron për vizitë pune në Finlandë ku mbajti takim me përfaqësuesit e ”Komitetit të Madh” në kuadër të Parlamentit të Finlandës, kryesuar nga Zëvendëskryetari i Parë i Parlamentit, Jani Makela.

Në takim u shkëmbyen mendime lidhur me procesin euro- integrues të vendit, dhe mbështetjen në këtë drejtim nga ana e Finlandës në kuadër të kryesimit të tyre me BE-në.

“Maqedonia e Veriut ka kapacitet politik dhe institucional për ta vazhduar rrugën drejt anëtarësimit të plotë në Union, dhe ne si Qeveri mbetemi të përkushtuar në këtë proces deri në anëtarësim të plotë në BE dhe NATO” – theksoi Osmani në takim.

Në vazhdim të vizitës, Zëvendëskryeministri Osmani kishte takim edhe në Drejtorinë për autonomi dhe barazi pranë Ministrisë së Drejtësisë të Republikës së Finlandës, me Korina Tamenma, përfaqësuese e lartë për çështje gjuhësore. Në takime u këmbyen përvoja për aplikimin e dygjuhësisë në Finlandë, si vend që ka implementim të suksesshëm në këtë proces.

Në kuadër të takimit u shqyrtuan edhe mundësitë për bashkëpunim në këtë drejtim, me qëllim të implementimit të suksesshëm të Ligjit për përdorimin e gjuhëve edhe në Republikën e Maqedonisë së Veriut.

Gjatë vizitës në Finlandë, zëvendëskryeministri Osmani mbajti takime pune edhe me Ministren për Punë Evropiane, Tuti Tupurainen, si dhe me Ministrin për Punë të Jashtme, Peka Havisto.