Raporti i Bankës Botërore: Për rritje ekonomike, të zbatohen reformat

Në raportin për Ballkanin Perëndimor, Maqedonisë i sugjerohet të vë theksin në reformat ekonomike. Si burim kryesor i rritjes ekonomike parashikohet të jenë investimet e huaja, thuhet në raport. Raporti tregon se papunësia është ulur, por ka vazhduar presioni ndaj pagave si pasojë e mungesës së forcës punëtore në disa sfera.

Në 100 banorë, të punësuar janë 26. Prej tyre 8 në sektorin privat, ndërkaq 18 në sektorin publik. Rritja e pagës minimale, sipas ekspertëve botërorë, do të godasë industrinë e tekstilit. Pritet rritje e borxhit publik me ndërtimin e rrugëve.

“Presim rritje graduale të rritjes ekonomike që do të arrinte 3.2% në vitin 2020. Rritjen do ta nxisnin shpenzimet, por ndryshimi do të ndikohet nga investimet, më saktë nga investimet e sektorit publik, pasi që kemi zhbllokim të ndërtimit të rrugëve që u stopuan përkohësisht për shkak të problemeve teknike, por edhe ndërprerjes së moratoriumit të autoriteteve lokale”,- u shpreh përfaqësuesi i Bankës Botërore në Maqedoni, Bojan Shimbov.

“Do të duhet të zbatohen politika të cilat do të ndërprenë rritjen e mëtejme të borxhit. Maqedonia tani është në nivelin prej 49% të GDP-së, që mund të thuhet se është një nivel i konsiderueshëm i borxhit. Andaj do të duhet të bëhet baraspeshë midis financave dhe në të njëjtën kohë gjetjen e politikave të cilat do të nxisin zhvillim ekonomik”,- tha eksperti i ekonomisë për rajonin, Sanja Maxharoviq Shujster.

Sipas Raportit të Bankës Botërore rritje më të madhe ekonomike pritet të ketë Kosova prej 4.4%, ndërkaq më të ulët Mali i Zi prej 2.9%. Shqipëria pritet të realizojë rritje ekonomike prej 3.8%. (Tvm2)