Rasti “Fortesa 2”, janë djegur thasë me dokumente e regjistra

Redaksia 2 vjet ago

Me urdhër të eprorit, Nikolla Boshkovski, thasë të zinj përplot me letra dhe regjistra nga ndërtesa e tretë e MPB-së janë djegur në lokacionin “Brest”, i cili gjendet në aeroportin e Shkupit, në pjesën ushtarake.

Kështu ka deklaruar dëshmitari, Mirçe Micevski, i punësuar në MPB, për rastin “Fortesa 2” të PSP-së.

Ai tha se së bashku me një kolegë tjetër ka mbushur një furgon “Reno trafik” me materiale nga bodrumi i teknikës operative të MPB-së. Gjatë dëshmisë së tij ai theksoi se nuk e din përmbajtjen e materialeve të djegura, por që është i sigurt se kanë qenë letra dhe regjistra.

“Në bazën në “Brest” na priti Vanço Cvetanovski, i cili tashmë kishte siguruar vend për djegien, i ndërtuar me gurë, ndërsa kishte edhe aparate kundër zjarrit”,- deklaroi Micevski dhe shtoi se me ata kanë qenë tre persona të tjerë nga Komisioni.

Në “Fortesa 2” i akuzuari i parë është ish-shefi i Drejtorisë së Pestë, Goran Grujevski, si dhe gjashtë të punësuar tjerë në DSK, të cilët akuzohen për falsifikim të dokumenteve dhe për shkatërrimin e dokumentacionit zyrtar lidhur me përgjimin e kundërligjshëm.

RASTI “TITANIK”, JANAKIEVSKIT I HIQET PARABURGIMI SHTËPIAK

Ndërkohë, gjykimi tjetër i përfaqësuar nga PSP-së “Titanik” është anuluar për shkak të mungesës së gjykatësit, Ognen Stavrev.

Gjatë seancës së sotme u kuptua se Gjykata Penale, kohë më parë, për këtë lëndë ka ndërprerë arrestin shtëpiak për ish ministrin e transportit dhe lidhjeve, Mile Janakievskin. Janakievski vazhdon të vuajë dënimin me burgim shtëpiak për ngjarjet e “27 prillit”, ku është i dyshuar.

Rasti “Titanik” ka të bëjë me parregullsitë zgjedhore, ku përveç Janakievskit, të akuzuar janë edhe ish-kryeministri, Nikolla Gruevski , Kiril Bozhinovski, Gordana Jankulloska dhe 16 persona të tjerë.

“Titanik” gjendet në procedurë dëshmie ku prezantohen prova materiale, ndërsa seanca e radhës vazhdon më 23 prill. (TVM2)