Skupifestival nis edicionin e radhës nga data 17 deri 22 shtator

Redaksia Flaka
By Redaksia Flaka 15 Shtator, 2020 19:46

Skupifestival nis edicionin e radhës nga data 17 deri 22 shtator

FNT Skupifestival Shkup do nis edicionin e 14 me radhë nga data 17 deri më 22 shtator. Hapja solemne do të bëhet të enjten në ora 20: 00, pra më datë 17 shtator, në hapësirat e Kurshumli Han-it.

Menjëherë pas hapjes do nis edhe programi i festivalit. Në natën e parë në program është shfaqja “Kutia e Zezë” nga Paolo Genovese e inskenuar nga teatri Migjeni nga Shkodra. Gjithashtu edhe në netët në vazhdim të gjitha shfaqjet do nisin nga ora 20: 00.

Këtë vit i gjithë programi i festivalit do të organizohet në hapësirat e Kurshumli Han-it në Çarshinë e Shkupit, në ambient të hapur të shtyrë edhe për shkak të situatës e Pandemisë me Kovid 19. Vlen të theksohet se i gjithë aktiviteti i programit të festivalit do të mbahet sipas protokollit për Kovid 19, dhënë nga ministria e Kulturës së RMV.

“Programi i sivjetmë është i selektuar me një larmi dramaturgjike që ka për bazë në thelb fatin e njeriut karshi stuhive të ndryshme nga jeta. Si dhe sfidat e ndryshme nga jeta sociale, ekonomike e politike, ku vjen në pah mendimi kritik i njeriut të thjeshtë karshi fenomeneve të reja. Fillojmë me datë 17 e enjte ora 20 me shfaqjen “Kutia e Zezë” nga Paolo Genovese ,teatri Migjeni Shkodër nga Shqipëria, vazhdojmë të nesërmen po prape në ora 20:00 me “Anomalia gramatikore ” nga Frania Petrinovich , Teatri Kombëtar nga Novi Sad, Serbi. Pastaj me “E gjithë dashuria ime” nga Laurent Mauvignier ,Teatri i Luftës në Sarajevë, Bosnjë & Hercegovinë. Në natën tjetër do vij “Zgjimi i Pranverës” nga Frank Wedekind vënë në skenë nga Teatri Kombëtar i Kosovës. Nga Bullgaria vjen shfaqja “Pula” nga A. P. Chehov dhe Niloay Kolyada, SPAM Studios Sofje. Në ora 17: 00 do të shfaqet “Lopata e Artë” nga autori Ferdinand Hysi , teatri Mërgimtari, nga Zagrebi i Kroacisë, ku më pas nga ora 20:00 do të shfaqet ” Një pjesë nga koleksioni” nga Dimitar Voev , Teatri Vagabonti Sofje, Bullgari”, thuhet në kumtesën e organizatorëve.

Siç dihet edhe nga vitet e mëparshme FNT Skupifestival ka edhe karakter garues, ku juria e përzgjedhur vendos për shfaqjen më të të festivalit. Në këtë edicion për shfaqjen më të mirë do të kujdesen juria e përbërë nga aktorja Amernis Nokshiqi, gazetarja për kulturë Evis Halili,si dhe regjisorja Natasha Popllavska.

Ndryshe, FNT Skupifestival edhe për këtë vit i falënderon mbështetësit e tij Ministrinë e Kulturës, Qytetin e Shkupit, Kurshsumli Han-in, si dhe mbështetësit medial gazetën Koha, televizion Alsat-M, TVM2 dhe mediumet e tjera që na kanë ndihmuar në informimin e opinionit të gjerë për aktivitetit e FNT Skupifestival-it . Për më shumë informacione: http://www.skupifestival.mk/  MIA

Redaksia Flaka
By Redaksia Flaka 15 Shtator, 2020 19:46