Vajgël: Nuk ka vend për pesimizëm për euro-integrimet

Redaksia
By Redaksia 11 Prill, 2019 20:35

Vajgël: Nuk ka vend për pesimizëm për euro-integrimet

Raportuesi për Maqedoninë në Parlamentin Evropian, Ivo Vajgël, në një intervistë për MIA, tha se nuk ka vend për pesimizëm sa i përket integrimeve të Maqedonisë së Veriut. Sipas tij, vendi ka hapur rrugën dhe ka rritur në mënyrë të konsiderueshme kredibilitetin, duke shtuar se ajo tashmë është pothuajse anëtare e plotë e NATO-s, ndërsa për anëtarësim në BE ka një procedura në të cilën ka hyrë vendi dhe nuk sheh se ka rrugë mbrapa. Vajgl vlerëson se Maqedonia e Veriut është një nga tregimet e suksesshme dhe sipas tij, e ardhmja do të vërtetojë vendimet që janë marrë në të kaluarën.

“Kuptohet se i di mirë problemet e Maqedonisë, se nuk është gjithçka perfekte, se afrohet zgjedhjet presidenciale dhe e di se ka akoma dyshime rreth Marrëveshjes së Prespës, ka parti dhe njerëz që mendojnë se Maqedonia nuk është dashur të bëjë lëshime të tilla për të siguruar rrugën e saj për në BE dhe NATO. Por këto janë hipoteza. Unë jam i bindur se ajo që u bë është e arsyetuar dhe se e ardhmja këtë do ta konfirmojë. Nuk ka dyshime se BE është qëllimi që Maqedonia duhet ta realizojë për të ardhme më të mirë dhe më të sigurt”

I pyetur për zgjedhjet presidenciale, organizimin dhe bojkotin eventual të tyre, Vajgl tha se praktika e pengesave dhe bllokimeve që e kanë aplikuar disa herë politikanët në vend, asnjëherë nuk i ka sjellur mirë Maqedonisë.

“Sido që të jetë rezultati i zgjedhjeve, është e dëmshme nëse nuk ka qëndrim të përbashkët nga udhëheqësit. Pengesat që i ka bërë presidenti Ivanov tani nuk janë në të mirë të Maqedonisë. Mendoj se në një shoqëri demokratike ka mënyra tjera për të luftuar për atë që beson. Duhet të kihet parasyshë se nëse vendoset ndonjë bllokadë ose ka krizë, shteti është ai që do të humb”.

Sa i përket Prokurorisë Speciale, ai ka thënë se duhet t’i jepet hapësirë që ta bëjë punën e saj dhe të gjithë të interesohen që të ketë kushte normale për të. Ajo nuk duhet të shihet si hakmarrje, ka vazhduar Vajgl, por kalim dhe pranim i shtetit të së drejtës dhe sundimit të së drejtës si mënyrë e vetme e qeverisjes në kushte demorkatike. /SHENJA/

Redaksia
By Redaksia 11 Prill, 2019 20:35